काठमाडौं । नेकपा (एमाले) का अध्यक्ष केपी शर्मा ओलीले वर्तमान सरकारलाई ‘कठपुतली’ र ‘असंवैधानिक’ सरकारको संज्ञा दिएका छन् । सरकारले देशलाई गलत दिशातर्फ अघि बढाइरहेको आरोप लगाउँदै ओलीले कृत्रिम र अनधिकृत ढंगले सरकार गठन गरेर निर्वाचनका नाममा नाटक गरिएको दाबी गरे ।
उनले प्रतिनिधिसभाको कार्यकाल बाँकी रहँदै संसद् विघटन गरी नयाँ संसद् खोजिनुको उद्देश्य आफूअनुकूलको संसद् निर्माण गर्नु रहेको बताए ।
ओलीले शासन सञ्चालनका लागि अनुभव, दक्षता र राजनीतिक सीप आवश्यक पर्ने उल्लेख गर्दै ‘नयाँले गर्नुपर्छ, पुरानाले हुँदैन’ भन्ने नाममा अनुभवी व्यक्तिलाई पन्छाउँदा देशले समस्या भोग्नुपरेको जिकिर गरे । अनुभव नभएका व्यक्तिलाई महत्वपूर्ण जिम्मेवारी दिइँदा सरकार सञ्चालनमै कठिनाइ देखिएको उनको भनाइ थियो ।
वर्तमान जनप्रतिनिधिको क्षमता र अनुभवमाथि समेत प्रश्न उठाउँदै ओलीले उनीहरूको भूमिकाबारे गम्भीर समीक्षा गर्नुपर्ने आवश्यकता औंल्याए । संविधानलाई सही बाटोमा फर्काउन र लोकतान्त्रिक प्रक्रियालाई पुनः व्यवस्थित गर्नुपर्नेमा उनले जोड दिए ।
संविधान मिचिएको आरोप लगाउँदै ओलीले संविधानको रक्षा र लोकतान्त्रिक व्यवस्थालाई सही दिशामा अघि बढाउने जिम्मेवारी आफूहरूको रहेको बताए । प्रतिनिधिसभा विघटन गरेर असंवैधानिक सरकारले निर्वाचनको नाममा नाटक गरिरहेको उनको आरोप थियो ।
आफूहरूमाथि राजनीतिक रूपमा नियन्त्रण कायम गर्ने प्रयास भए पनि त्यसलाई स्वीकार नगरी अघि बढिरहेको ओलीले बताए ।
प्रकाशित मिति: ३१ श्रावण २०८३, आइतबार
प्रतिक्रिया