एजेन्सी । सोमवार विश्व बजारमा कच्चा तेलको मूल्यमा उल्लेखनीय कमी आएको छ।
अमेरिकाले इरानमाथि थप कडा प्रतिबन्ध लगाउने तयारी गरेसँगै यसले मध्यपूर्वको तेल आपूर्तिमा असर पार्ने अनुमान गरिएको छ। यही कारणले लगानीकर्ताहरूले पहिले नै आफ्नो मुनाफा सुरक्षित गर्न खोजेका कारण तेलको मूल्य घटेको हो।
आज ब्रेन्ट क्रूड फ्युचर्स १.२२ डलर (१.२९ प्रतिशत) ले घटेर प्रति ब्यारेल ९३.१७ डलरमा झरेको छ। त्यस्तै, वेस्ट टेक्सास इन्टरमिडिएट अमेरिकी कच्चा तेल १.२० डलर (१.३८ प्रतिशत) ले घटेर प्रति ब्यारेल ८५.८६ डलरमा पुगेको छ।
अमेरिका र इरानबिचको शान्ति वार्ता असफल भएपछि र होर्मुज जलमार्गबाट हुने ढुवानीमा असर पर्ने भएपछि, गत हप्ता यी दुवै तेलको मूल्यमा ५ प्रतिशतभन्दा बढीको वृद्धि देखिएको थियो। यसले गर्दा बजारमा आपूर्ति प्रभावित हुने चिन्ता अझ बढेको छ।
अमेरिकी कोष सचिव (अर्थमन्त्री) स्कट बेसेन्टले सोमवार दिउँसो पत्रकार सम्मेलन गर्दै इरानमाथि इतिहासकै सबैभन्दा कडा प्रतिबन्धको घोषणा गर्ने तयारी गरेका छन्। अमेरिकाले इरानसँग व्यापार गर्ने देशहरूले कडा आर्थिक परिणाम भोग्नुपर्ने चेतावनी पनि दिएको छ।
विश्लेषकहरूका अनुसार अमेरिकी कदमले इरानको अर्थतन्त्रलाई कमजोर बनाउने प्रयास गरे पनि यसले ऊर्जा बजारमा थप जोखिम निम्त्याउन सक्नेछ। इरानका व्यापारिक साझेदारहरू र ढुवानीमा आएको यो नयाँ अवरोधले आगामी दिनमा थप आर्थिक उथलपुथल ल्याउन सक्ने देखिएको छ।
इरानले भने यसको विरोध गर्दै कूटनीतिक समाधान खोज्न आग्रह गरेको छ। अन्तर्राष्ट्रिय बजारका विज्ञहरूले इरानी नेतृत्वको कुन पक्ष हाबी हुन्छ भन्ने विषयले आगामी दिनमा तेलको मूल्यको दिशा तय गर्ने बताएका छन्।
अमेरिकी प्रशासनले तेहरानको आर्थिक जीवनरेखा काटेर एक्ल्याउने रणनीति लिएको छ भने यसले विश्वव्यापी रूपमा ऊर्जा सुरक्षामा पार्ने प्रभावबारे विभिन्न बहसहरू सुरु भएका छन्।
प्रकाशित मिति: ८ भाद्र २०८३, सोमबार
प्रतिक्रिया