काठमाडौं । बाराको सिमरामा तीन वर्षीया गरिमा चौधरीको बलात्कारपछि हत्या भएको घटनामा प्रहरीले थप एक जनालाई पक्राउ गरेको छ।
पक्राउ पर्नेमा जितपुर सिमरा उपमहानगरपालिका निवासी प्रदीप खड्का रहेका छन्। उनी विद्यार्थी रहेको प्रहरीले जनाएको छ।
जितपुर सिमरा उपमहानगरपालिका–१ मा गरिमा भदौ २ गते मृत अवस्थामा फेला परेकी थिइन्। घरबाट हराएको तीन दिनपछि उनको शव भेटिएको थियो।
प्रहरीको अनुसन्धानबाट गरिमाको बलात्कारपछि हत्या भएको निष्कर्ष निकालिएको छ। घटनाको अनुसन्धानका क्रममा प्रहरीले हालसम्म नौ जनालाई नियन्त्रणमा लिएको जिल्ला प्रहरी कार्यालय बाराका डीएसपी मीनबहादुर घलेले जानकारी दिए।
‘अहिलेसम्म प्रदीप खड्कासहित नौ जना पक्राउ परेका छन्,’ डीएसपी घलेले भने।
प्रहरीले घटनामा पक्राउ परेका व्यक्तिहरूमाथि थप अनुसन्धान अघि बढाइरहेको जनाएको छ।
प्रकाशित मिति: ८ भाद्र २०८३, सोमबार
प्रतिक्रिया