एजेन्सी। चिनियाँ राष्ट्रपति सी जिनपिङ बुधबारदेखि तीन दिने राजकीय भ्रमणका लागि अमेरिका जाँदैछन्। एक दशकभन्दा बढी समयपछि हुन लागेको उनको यो पहिलो अमेरिका भ्रमणलाई अमेरिका–चीन सम्बन्ध व्यवस्थापनका दृष्टिले महत्त्वपूर्ण मानिएको छ।
सीलाई स्वागत गर्न अमेरिकी राष्ट्रपति डोनाल्ड ट्रम्प आफैँ संयुक्त बेस एन्ड्र्युज पुग्ने कार्यक्रम छ। अमेरिकी राष्ट्रपतिले विदेशी राष्ट्रप्रमुखलाई विमानस्थलमै पुगेर स्वागत गर्ने अभ्यास दुर्लभ मानिन्छ।
बिहीबार सी र उनकी पत्नी पेङ लियुआनलाई ह्वाइट हाउसमा औपचारिक राजकीय स्वागत गरिनेछ। स्वागत समारोहपछि ट्रम्प र सीबीच द्विपक्षीय वार्ता हुनेछ भने बिहीबार साँझ ट्रम्प र प्रथम महिला मेलानिया ट्रम्पले सी र पेङको सम्मानमा राजकीय रात्रिभोज आयोजना गर्नेछन्। समारोहमा अमेरिकी सेनाका विभिन्न इकाइको प्रस्तुति तथा सैन्य फ्लाईओभरसमेत हुने ह्वाइट हाउसले जनाएको छ।
भ्रमणका क्रममा अमेरिका–चीन व्यापार सम्बन्ध, दुर्लभ पृथ्वीका खनिज, कृत्रिम बुद्धिमत्ता (एआई), ताइवान र इरानसँग सम्बन्धित विषयमा छलफल हुने अपेक्षा गरिएको छ। व्यापार तथा दुर्लभ पृथ्वीको आपूर्ति दुई देशबीच लामो समयदेखि विवाद र वार्ताको विषय रहँदै आएका छन्।
एआई पनि वार्ताको प्रमुख विषय बन्ने देखिएको छ। अमेरिका र चीन अत्याधुनिक प्रविधिको विकासमा प्रतिस्पर्धा गरिरहेका बेला एआईबाट उत्पन्न जोखिम व्यवस्थापन तथा दुई देशबीच संवादको संयन्त्र विकास गर्ने विषयमा समेत छलफल हुन सक्ने अमेरिकी अधिकारीहरूले बताएका छन्।
ताइवानको विषय पनि दुई नेताबीचको वार्तामा उठ्ने अपेक्षा गरिएको छ। अमेरिकाले ताइवानसँग सुरक्षा सम्बन्ध कायम राख्दै आएको छ भने चीनले ताइवानलाई आफ्नो भूभागका रूपमा दाबी गर्दै आएको छ। त्यस्तै, इरानसँग चीनको सम्बन्ध र क्षेत्रीय परिस्थितिका विषयमा पनि छलफल हुन सक्ने बताइएको छ।
अमेरिका र चीनबीच व्यापार तथा प्रविधिका क्षेत्रमा प्रतिस्पर्धा कायम रहे पनि पछिल्लो समय दुवै पक्ष सम्बन्ध थप बिग्रन नदिन संवाद र सहकार्यको बाटो खोजिरहेका छन्। चिनियाँ विदेश मन्त्रालयले पनि भ्रमणका क्रममा द्विपक्षीय सम्बन्ध र विश्वव्यापी मुद्दामा संवाद, मतभेद व्यवस्थापन तथा सहकार्य बढाउने विषयमा छलफल हुने जनाएको छ।
यद्यपि, भ्रमणबाट ठूलो सम्झौता वा निर्णायक उपलब्धि हासिल हुने अपेक्षा भने सीमित रहेको विश्लेषणहरू सार्वजनिक भएका छन्। व्यापार, दुर्लभ पृथ्वी र प्रविधिसम्बन्धी विषयमा केही प्रगति भए पनि दुई देशबीचका दीर्घकालीन रणनीतिक मतभेद तत्काल समाधान हुने सम्भावना कम रहेको विश्लेषकहरूको भनाइ छ।
भ्रमणको अन्तिम दिन शुक्रबार सी र पेङले ट्रम्प तथा मेलानिया ट्रम्पसँग ह्वाइट हाउसमा निजी चियापानमा सहभागी हुनेछन्। त्यसपछि उनीहरू वासिङ्टनस्थित राष्ट्रिय अभिलेखालय जाने कार्यक्रम छ। त्यहाँ अमेरिका–चीन सम्बन्धसँग सम्बन्धित ऐतिहासिक अभिलेख तथा दस्तावेज अवलोकन गर्ने कार्यक्रम रहेको ह्वाइट हाउसले जनाएको छ।
प्रकाशित मिति: ७ आश्विन २०८३, बुधबार
प्रतिक्रिया