काठमाडौं । वैदेशिक रोजगारीमा जाने यात्रुसँग पुनः श्रम स्वीकृति गराइदिने बहानामा रकम लिएको आरोपमा हिमालयन एअरलाइन्सका कर्मचारी हंशराज जैशी पक्राउ परेका छन्।
त्रिभुवन अन्तर्राष्ट्रिय विमानस्थलस्थित अध्यागमन कार्यालयले उनलाई नियन्त्रणमा लिएर आवश्यक कारबाहीका लागि विमानस्थल सुरक्षा कार्यालयको जिम्मा लगाएको जनाएको छ।
अध्यागमन कार्यालयका अनुसार असोज २६ गते वैदेशिक रोजगारीमा जान लागेका मीनबहादुर रावतको श्रम स्वीकृतिको म्याद सकिएको थियो। पुनः श्रम स्वीकृति गराइदिने र यात्रामा सहजीकरण गर्ने बहानामा जैशीले रकम लिएको भन्दै फोनमार्फत उजुरी परेको थियो।
उजुरीका आधारमा गरिएको प्रारम्भिक छानबिनमा जैशीको ई–सेवा खातामा १४ हजार रुपैयाँ पठाइएको भेटिएको अध्यागमनले जनाएको छ। विमानस्थलको सीसीटीभी फुटेज जाँच गर्दा यात्रुलाई सहजीकरण गर्ने बहानामा शंकास्पद गतिविधि गरेको देखिएपछि उनलाई नियन्त्रणमा लिइएको हो।
प्रकाशित मिति: २८ आश्विन २०८३, बुधबार
प्रतिक्रिया