विराटनगरमा एक वृद्धले गरे आत्मदाह प्रयास

विराटनगर । विराटनगरमा बिहीबार एक वृद्धले आत्मदाहको प्रयास गरेका छन् ।

लेटाङ घर भएका नेपाल थरका ६५ वर्षीय वृद्धले आफ्नै शरीरमा पेट्रोल छर्किएर आगो लगाएका हुन् । शरीरका अधिकांश भाग जलेको कारण उनको अवस्था गम्भीर छ ।

मोरङ प्रहरीका प्रवक्ता डीएसपी रञ्जनकुमार दाहालका अनुसार ग्यालिनमा पेट्रोल लिएर आएका उनले विराटनगर महानगरपालिका-४ तित्रिगाछीमा पुगेर शरीरमा पेट्रोल खन्याएका थिए । जल्दै गरेको देखेपछि स्थानीयले प्रहरीलाई खबर गरेका थिए ।

स्थानीयले पानी खन्याएर आगो निभाउने प्रयास गरेका थिए । प्रहरी टोली पुगेर हेर्दा उनको झोलामा रहेको नागरिकताका आधारमा उनको पहिचान खुलेको थियो । वृद्धलाई उपचारका लागि नोबेल अस्पताल लगेकोमा थप उपचारका लागि रेडक्रस अस्पताल एन्ड ट्रमा सेन्टरमा लगिएको छ ।

डीएसपी दाहालले घटनाबारे अनुसन्धान सुरू भएको बताए ।

प्रकाशित मिति: १४ बैशाख २०८०, बिहिबार