काठमाडौँ । युवराज सफलले नेपालमा टिकटक बन्द गराउन माग गर्दै सञ्चारमन्त्री रेखा शर्मासमक्ष निवेदन दिएका छन् । टिकटकले नेपालमा अराजकता फैलाएको र यसको नियमन पनि नभएको भन्दै उनले निवेदन दिएका हुन् ।
रवि लामिछानेविरुद्ध मुद्दा हालेर चर्चामा आएका अभियन्ता युवराजले टिकटकको प्रयोगले नेपालमा छाडातन्त्र, गालीगलौज, मानहानी, अश्लीलता अपराध वृद्धि भएको निवेदनमा उल्लेख गरेका छन् ।
‘तत्कालका लागि टिकटक बन्द गराउन माननीय मन्त्रीज्यूको ध्यानाकर्षण गराउन चाहन्छु । साथै, टिकटक चलाउनै परेको खण्डमा पहिले नेपालमा सञ्चालन अनुमति लिन लगाउने र टिकटक सञ्चालन मापदण्ड, आचारसंहिता लागू गराउने र फेक आइडीहरूलाई चल्न नदिने वातावरण बनाई टिकटकलाई कानूनी दायरामा ल्याउन समेत माग गर्दछु’, उनको निवेदनमा भनिएको छ ।
टिकटकमा गेमको नाममा लाखौँ करोडौँको समेत कारोबार हुने गरेको र गिफ्ट प्राप्त गर्नेहरूले आजसम्म नेपालमा कुनै पनि राजश्व नतिरेको सफलको दाबी छ । टिकटक गेमलाई समेत करको दायरामा ल्याउन उनले माग गरेका छन् ।
उनले आफू पनि टिकटक लाइभमा नबस्ने घोषणा गरेका छन् ।
प्रकाशित मिति: १२ भाद्र २०८०, मंगलबार
प्रतिक्रिया