काठमाडौं । चार दिनअघि गत आइतबार होली खेलेर नुहाउन जाँदा धाब्लाङस्थित सुन नदीमा डुबेर बेपत्ता भएका तीनै जना बालबालिका मृत भेटिएका छन्।
उदयपुर र खोटाङको बिच भएर बग्ने सुनकोशी नदीमा नुहाउँदै गर्दा डुबेका त्रियुगा नगरपालिका-१४ साउनेका बालबालिका मृत भेटिएका हुन्।
त्रियुगा-१४ का वडाध्यक्ष हिमराज मगरका अनुसार बेपत्तामध्ये २ जनाकाे शव बुधबार ८ घण्टाको फरकमा भेटिएकाे हाे भने १ जनाकाे शव अघिल्लो दिन दिउँसो भेटिएकाे थियाे। बुधबार दिउँसो ३ः३० बजे १२ वर्षीय लोकबहादुर मगर र बिहान ७ः३० बजे १२ वर्षीया रेखा मगरकाे शव भेटिएकाे हाे।
लोकबहादुरकाे शव घटनास्थलदेखि अढाई किलोमिटर तल कम्पुघाटमा नदी किनारमा तैरिरहेको अवस्थामा भेटिएको वडाध्यक्ष मगरले बताए। रेखा घटनास्थलदेखि २ किलोमिटर तल सिम्लेमा भेटिएकी थिइन् भने रिदम अघिल्लो दिउँसो घटनास्थलदेखि १ किलोमिटर तल घिर्लिङमा आधा शरीर डुबेको अवस्थामा किनारमै भेटिएका थिए।
मृत भेटिएका तीनै जना बालबालिकाको शव पोष्टमार्टमका लागि सदरमुकामस्थित उदयपुर जिल्ला अस्पताल गाईघाट ल्याइएको छ।
प्रकाशित मिति: १४ चैत्र २०८०, बुधबार
प्रतिक्रिया