‘सिधा कुरा’ अनलाइनका सम्पादक र प्रकाशक जेल चलान

काठमाडौँ । अदालतको मानहानी ठहर भएसँगै पत्रकार द्वय नवीन ढुङ्गाना र युवराज कँडेल जेल चलान भएका छन् । उनीहरू केन्द्रीय कारागार जगन्नाथ देवल चलान भएका हुन् ।

सर्वोच्च अदालतको फैसला लगत्तै पत्रकार ढुङ्गानाले फेसबुकमार्फत फैसलालाई सम्मान गर्दै केन्द्रीय कारागार जगन्नाथ देवल चलान भएको जनाएका छन् । ‘सम्मानित सर्वोच्च अदालतको फैसलालाई सम्मान गर्दै म र मेरो प्रकाशक एवम् तपाईँहरूको प्रिय प्रस्तोता युवराज कँडेल केन्द्रीय कारागार जगन्नाथ देवल चलान भएका छौँ ।’ उनले लेखेका छन् ।

ढुङ्गानाले जेलबाट छुटेसँगै फेरि सञ्चाकर्ममै रहने र विचलित नहुने बताएका छन् । ‘प्रिय पाठक र श्रोताहरू हामी फेरि समाचार लेख्नै आउने छौँ । हामी समाचार लेख्न नै जन्मिएका हौँ । समाचारको धर्मबाट कहिल्यै विचलित हुने छैनौँ’, ढुङ्गानाले भनेका छन् ।

सर्वोच्चका प्रधान न्यायाधीश विश्वम्भवरप्रसाद श्रेष्ठसहित ९ न्यायाधीश संलग्न बृहत् पूर्ण इजलासले आइतबार निर्णय सुनाउँदै विवादित अडियो रेकर्ड गर्ने राजकुमार तिम्सिनालाई ६ महिना कैद सजाय सुनाएको थियो । यसैगरी सिधा कुराका कँडेल र ढुङ्गानालाई जनही ३ महिना कैद सजाय सुनाएको थियो । यद्यपि, माफी मागेमा ७ दिन मात्र कैद बस्नुपर्ने फैसलामा उल्लेख छ ।

प्रकाशित मिति: १४ आश्विन २०८१, सोमबार