नवलपरासी । शिक्षिकाको पिटाइबाट पश्चिम नवलपरासीमा एक ६ वर्षीय बालकको आँखा फुटेको छ। जिल्लाको प्रतापपुर गाउँपालिका– ३ स्थित एच पाठशालाको युकेजीमा अध्ययनरत ६ वर्षीय बालक प्रशान्त चौधरीको सोही विद्यालयकी शिक्षिका सञ्जु चौधरीको पिटाइबाट आँखा फुटेको हो।
जिल्ला प्रहरी कार्यालय नवलपरासीका प्रहरी नायब उपरीक्षक रेशम बोहराले शिक्षिकाको पक्राउ पुर्जी आएको र उनी फरार रहेको बताए। शिक्षिकाको पिटाइबाट बालकको आँखामा गम्भीर चोट लागी आँखाको ज्योति नै गुमाएको पीडित बालकका आफन्तले जनाएका छन्।
घटना मंसिर १८ को भए पनि अहिले मात्र बाहिर आएको हो। बालकका आफन्तले राष्ट्रिय मानव अधिकार आयोगमा उजुरी दिएपछि घटना बाहिर आएको हो।
प्रहरी नायब उपरीक्षक बोहराका अनुसार मंसिर १८ गते कक्षामा दुई विद्यार्थीबिचको झगडा छुट्याउने क्रममा शिक्षिका चौधरीले प्लास्टिकको लठ्ठीले हानेकी थिइन्। त्यही क्रममा बालकको आँखामा चोट लागेको विद्यालयका प्रधानाध्यापक सुजितकुमार गुप्ताले बताए।
प्रकाशित मिति: २८ पुस २०८१, आइतबार
प्रतिक्रिया