काठमाडौं । ठमेल क्षेत्रमा खटिएका सुरक्षाकर्मीमाथि आक्रमण गरेको आरोपमा नेकपा (एमाले) निकट विद्यार्थी संगठन अनेरास्ववियुका नेताहरूमाथि कानूनी कारबाही अघि बढाइएको छ।
सरकारी वकिलको कार्यालय काठमाडौंले आइतबार जिल्ला अदालत काठमाडौंमा उनीहरूमाथि मुद्दा दायर गरेको हो। अनेरास्ववियुका स्थायी कमिटी सदस्य कमलराज जोशीसहित गोपालबहादुर शाही, रमेशकुमार फुलारा, नविनसिंह ऐर, दिनेश सिग्देल र सौजन्य शाहीविरूद्ध कानूनी प्रक्रिया अघि बढाइएको छ।
उक्त घटना गत माघ २५ गते मध्यराति काठमाडौं महानगरपालिका-२६ स्थित छायाँ सेन्टर अगाडि घटेको थियो। आरोपअनुसार, सो क्रममा प्रहरी हवल्दार जगुलाल घर्ती र प्रहरी जवान नगेन्द्रराज विष्टमाथि उनीहरूको समूहले शारीरिक आक्रमण गरेको थियो।
प्रहरी प्रतिवेदन अनुसार, घटनामा संलग्न व्यक्तिहरूमाथि ‘अभद्र व्यवहार’ सम्बन्धी कसूरमा मुद्दा दर्ता गरिएको छ। सामान्यतया, यस्ता घटनामा प्रहरीले २५ दिनसम्म अनुसन्धान गरी मुद्दा चलाउने भए पनि यस घटनामा दुई सातामै मुद्दा दायर गरिएकाले प्रहरी प्रशासनको आलोचना भइरहेको छ।
सरकारी वकिलको कार्यालयले दोषी प्रमाणित भएमा उनीहरूलाई अधिकतम एक वर्षसम्म कैद सजाय वा १० हजार रुपैयाँसम्म जरिवाना वा दुवै सजायको माग गरेको छ। साथै, कमलराज जोशी, गोपालबहादुर शाही र दिनेश सिग्देलले बारम्बार यस्ता गतिविधि दोहोर्याएको ठहर गर्दै उनीहरूका लागि थप कडा सजायको माग गरिएको छ।
प्रकाशित मिति: १२ फाल्गुन २०८१, सोमबार
प्रतिक्रिया