काठमाडौँ – प्रविधिको प्रयोग बढेसँगै मानिसहरू मोबाइल फोनलाई आफ्नै शरीरसँग टाँसेर राख्ने गर्छन्। तर भारतको मध्यप्रदेश, राजगढ़ जिल्लामा भएको एक घटनाले मोबाइल सुरक्षित प्रयोग नगर्दा कति गम्भीर दुर्घटना हुन सक्छ भन्ने देखाएको छ।
राजगढ़को सारङ्गपुर निवासी १९ वर्षीय अरविन्द कुमारको खल्तीमा रहेको मोबाइल अचानक विस्फोट हुँदा उनको अण्डकोषमा गम्भीर चोट लागेको छ। उनी पेशाले पानीपुरी व्यापारी हुन्।
घटना कसरी भयो?
मंगलबार, अरविन्द तरकारी बजारबाट सागपात किनेर आफ्नो गाउँ नैनवाडा फर्किंदै थिए। यात्रा क्रममा उनले आफ्नो पाइन्टको अगाडिको खल्तीमा राखेको मोबाइल अचानक विस्फोट भयो। विस्फोटको झट्काले उनी सवार बाइक असन्तुलित भई लड्दा उनको टाउकोमा पनि चोट लाग्यो। तर सबैभन्दा गम्भीर असर उनको गोप्य अंगमा पर्यो, जसले गर्दा उनको अण्डकोष फुटेको बताइएको छ।
दुर्घटनापछि स्थानीयले तुरुन्तै एम्बुलेन्स बोलाई उनलाई अस्पताल पुर्याए। प्राथमिक उपचारपछि उनलाई थप उपचारका लागि शाजापुर अस्पताल रेफर गरिएको छ।
पुरानो मोबाइल पड्किनुको कारण के?
प्राप्त जानकारीअनुसार अरविन्दले प्रयोग गरिरहेको मोबाइल एक पुरानो मोडल थियो, जसलाई उनले रातभर चार्जमा राखेका थिए। त्यसपछि उनले सोही मोबाइल बोकेर बजार गएका थिए। अधिक गर्मी वा ब्याट्री खराबीका कारण मोबाइल विस्फोट भएको हुनसक्ने अनुमान गरिएको छ।
सुरक्षित मोबाइल प्रयोगको आवश्यक चेतना
यो घटना मोबाइलको असुरक्षित प्रयोगले गम्भीर दुर्घटना निम्त्याउन सक्छ भन्ने उदाहरण हो। विशेषगरी, पुरानो र लोकल ब्याट्री भएका मोबाइललाई अत्यधिक चार्ज नगर्नु, खल्तीमा नराख्नू, र आवश्यकता अनुसार ब्याट्रीको अवस्था जाँच गरिरहनु आवश्यक छ।
मोबाइल सुरक्षाका लागि अपनाउनुपर्ने सावधानीहरू:
- रातभर मोबाइल चार्जमा नराख्नुहोस्।
- अत्यधिक तातिएको मोबाइल तुरुन्तै बन्द गर्नुहोस्।
- लोकल वा गुणस्तरहीन ब्याट्री प्रयोग नगर्नुहोस्।
- मोबाइललाई खल्तीमा नराखी झोलामा राख्नु सुरक्षित हुन्छ।
यो घटनाले मोबाइल सुरक्षित प्रयोग नगर्दा कस्तो भयानक दुर्घटना निम्तिन सक्छ भन्ने देखाएको छ।
प्रकाशित मिति: ६ चैत्र २०८१, बिहिबार
प्रतिक्रिया