काठमाडौं । धरान उपमहानगरपालिकाका मेयर हर्क साम्पाङ राईले अब देशभर ‘हर्क साम्पाङ अ रिभोलुसन टीम’ गठन गर्ने घोषणा गरेका छन्।
सामाजिक सञ्जालमार्फत आफ्नो भनाइ सार्वजनिक गर्दै उनले मुलुकभरिका परिवर्तन चाहने नागरिकलाई अभियानमा जोडिन आग्रह गरेका हुन्। राईले आफूले बोकेको सोच, दृष्टिकोण र क्रियाकलापप्रति विश्वास राख्ने सबैलाई यो अभियानमा सहभागी हुन आग्रह गरेका छन्।
“अब हामी सम्पूर्ण देशभर ‘हर्क साम्पाङ अ रिभोलुसन टीम’ निर्माण गर्नेछौं। जो–जोले मलाई मन पराउनुहुन्छ, मेरो सोच र कार्यशैलीमा विश्वास गर्नुहुन्छ, सबैजनालाई म यो अभियानमा स्वागत गर्न चाहन्छु,” उनले लेखेका छन्।
आफू नेतृत्वका लागि तयार रहेको स्पष्ट पार्दै उनले भनेका छन्, “अब नेतृत्व म दिन्छु। अरूको वशको कुरा होइन यो। देशप्रति साँचो माया गर्नेहरू जुट्नुस्, अब परिवर्तनको लहर फैलाउँछौं।”
हर्क साम्पाङले स्थानीय तहमा देखाएको क्रियाशीलता र जनसमर्पणका कारण सामाजिक सञ्जालमा निकै लोकप्रियता कमाएका छन्। अब अहिले उनले आफ्ना विचारहरूलाई राष्ट्रिय तहमा विस्तार गर्दै अभियानको रुप दिन खोजेका छन्।
प्रकाशित मिति: ५ बैशाख २०८२, शुक्रबार
प्रतिक्रिया