काठमाडौं — नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले यथास्थितिवादी प्रवृत्तिका कारण प्रतिगमनकारी शक्तिहरू फेरि सक्रिय बन्दै गएको बताएका छन्।
मंगलबार काठमाडौंमा आयोजित ‘नेपाली कम्युनिस्ट आन्दोलनको ७५ वर्ष र अबको कार्यभार’ विषयक विचार गोष्ठीमा बोल्दै उनले यस्तो प्रवृत्तिलाई पराजित गर्न सबै वामपन्थी शक्ति एकताबद्ध हुनुपर्नेमा जोड दिए ।
श्रेष्ठले सत्ता मोह, भ्रष्टाचार र निरंकुश प्रवृत्तिले यथास्थितिवादलाई मलजल दिइरहेको भन्दै सरकार स्वयं यथास्थितिवादको वाहक बनेको आरोप लगाए। उनले प्रतिगमन विरुद्धको संघर्ष सफल पार्न सरकारको यथास्थितिवादी चरित्रसँग पनि जुध्नुपर्ने आवश्यकता औँल्याए।
उनले वामपन्थी पार्टीहरूबीच एकता र ध्रुवीकरणको प्रक्रिया अगाडि बढाउँदै कम्युनिस्ट आन्दोलनलाई सशक्त बनाउनेतर्फ ध्यान दिनुपर्ने बताए । श्रेष्ठले सामाजिक–आर्थिक रूपान्तरणलाई संविधानको प्रभावकारी कार्यान्वयनमार्फत प्राथमिकता दिनु आजको मुख्य कार्यभार भएको उल्लेख गरे।
उनले भने, “हामीले संघर्ष गरेर ल्याएको संविधान र जनताको अधिकारलाई संस्थागत गर्दै शान्तिपूर्ण बाटोबाट समाजवादउन्मुख समृद्धिको यात्रालाई निरन्तरता दिनुपर्छ। त्यसका लागि सडक, सदन र सरकार—तीनै मोर्चाको संयोजन आवश्यक छ।”
प्रकाशित मिति: ९ बैशाख २०८२, मंगलबार
प्रतिक्रिया