काठमाडौं । छतबाट खसेर गम्भीर घाइते भएका एक प्रहरी सहायक निरीक्षक (असई) प्रेम कटवालको निधन भएको छ।
धनकुटा जिल्ला प्रहरी कार्यालयमा कार्यरत ४५ वर्षीय कटवाल कोशी प्रदेशस्थित इटहरी उपमहानगरपालिका–१० स्थित आफ्नै घर बिदामा आएका थिए। घरको निर्माणाधीन छतमा पानी हाल्ने क्रममा उनी अचानक खसेका थिए।
प्रहरीका अनुसार छतबाट खस्दा गम्भीर चोट लागेका कटवाललाई तत्कालै उपचारका लागि अस्पताल लगिएको थियो। तर, चिकित्सकहरूले उनलाई मृत घोषित गरेका हुन्।
घटनाबारे जानकारी दिँदै कोशी प्रदेश प्रहरी कार्यालयका प्रवक्ता एसएसपी भीमबहादुर दाहालले दुर्घटनामा असई कटवालको निधन भएको पुष्टि गरेका छन्।
कटवालको निधनप्रति प्रहरी परिवारमा शोक छाएको छ।
प्रकाशित मिति: २३ बैशाख २०८२, मंगलबार
प्रतिक्रिया