कश्मीर क्षेत्रमा ४० बढी सैनिक मारिएको पाकिस्तानको दाबी

काठमाडौँ । भारत र पाकिस्तानबीच तनाव चुलिँदा सीमावर्ती क्षेत्रहरूमा आक्रमण, विस्फोट र ब्ल्याकआउट भएको छ।

भारतीय अधिकारीहरूले पाकिस्तानले भारतको विभिन्न सैनिक अड्डा तथा कश्मीर क्षेत्रमा मिसाइल र ड्रोन आक्रमण गरेको दाबी गरेका छन्। तर पाकिस्तानले यो आरोपलाई अस्वीकार गर्दै भारतले गलत सूचना फैलाइरहेको प्रतिक्रिया दिएको छ। सीएनएनको रिपोर्ट अनुसार भारतका सुरक्षा निकायले यो आक्रमणपछि पञ्जाब, कश्मीर र राजस्थानका केही स्थानहरूमा विद्युत् सेवा बन्द (ब्ल्याकआउट) गरेको जनाएका छन्। स्थानीय बासिन्दाहरूले स्थिति भयावह र तनावपूर्ण भएको बताएका छन्।

कश्मीर र पञ्जाबमा विस्फोट

भारतीय सेनाका प्रवक्ताका अनुसार जम्मू सहरमा ठूलो आवाजको विस्फोट सुन्निएको र त्यसपछि सम्पूर्ण क्षेत्रमा ब्ल्याकआउट गरिएको हो। स्थानीय पत्रकार तथा सर्वसाधारणले सहरभरि आतंकको अवस्था व्याप्त भएको बताएका छन्। पञ्जाबको पठानकोट क्षेत्रमा पनि विस्फोटको खबर आएपछि हवाई सुरक्षा प्रणाली सक्रिय गरिएको अधिकारीहरूले जनाएका छन्।

पाकिस्तानको दाबी: ४०–५० भारतीय सैनिक मारिएको

पाकिस्तानको सूचना मन्त्रालयले भारत–नियन्त्रित कश्मीरको वास्तविक नियन्त्रण रेखा (LOC) नजिकैका क्षेत्रमा ४० देखि ५० जना भारतीय सैनिक मारिएको दाबी गरेको छ। यद्यपि, सीएनएनले यस दाबीको स्वतन्त्र पुष्टि गर्न नसकेको र भारतीय रक्षा मन्त्रालयसँग प्रतिक्रिया मागिएको उल्लेख गरिएको छ।

भारतीय ड्रोन नष्ट गरिएको दाबी

पाकिस्तानी सेनाका प्रवक्ता मेजर जनरल अहमद शरीफ चौधरीले पाकिस्तानले भारतका २९ वटा ड्रोन नष्ट गरेको दाबी गरे। उनका अनुसार ती आक्रमणमा तीन जनाको मृत्यु भएको र चार जना घाइते भएका छन्।

भारतको प्रतिक्रिया: आतंककारी संरचनामाथि लक्षित हमला

भारतका अमेरिका स्थायी प्रतिनिधि विनय क्वात्राले भने, “भारतले गत बुधवार पाकिस्तानमा गरेको हवाई हमला अन्तिम कारबाही मानेको थियो र तनाव घटाउने उद्देश्य राखिएको थियो। तर पाकिस्तानले जवाफी कारबाही गर्दै स्थिति झनै बिगारेको छ। भारतले मात्र आतंकवादी संरचनामाथि निशाना साधेको हो।”

एक भारतीय जेट नष्ट भएको अमेरिकी अधिकारीको दाबी

अमेरिकी एक वरिष्ठ अधिकारीले भारतको हवाई कारबाहीमा पाकिस्तानले एक भारतीय लडाकु विमान खसालेको बताएका छन्। पाकिस्तानले भने पाँच भारतीय युद्धक विमान नष्ट गरिएको दाबी गरेको छ, जसमा फ्रान्समा निर्मित तीन विमान पनि छन्। भारतले भने हालसम्म यसमा कुनै प्रतिक्रिया दिएको छैन।

प्रकाशित मिति: २६ बैशाख २०८२, शुक्रबार