काठमाडौं । अमेरिका र चीनले आपसी व्यापार तनाव कम गर्न एकअर्काको आयातमा लगाइएको भन्सार शुल्क अस्थायी रूपमा घटाउने सहमति गरेका छन्। अमेरिकी अर्थमन्त्री स्कट बेसेन्टका अनुसार, दुबै मुलुकले आगामी ९० दिनका लागि पारस्परिक कर औसत ११५ प्रतिशतले घटाउने निर्णय गरेका हुन्।
स्विट्जरल्याण्डमा सम्पन्न वार्तापछि सोमबार यो सम्झौता सार्वजनिक गरिएको हो। अर्थमन्त्री बेसेन्टले वार्तालाई “उत्पादक र रचनात्मक” भन्दै सकारात्मक मूल्याङ्कन गरेका छन्।
यो सहमति अमेरिकी राष्ट्रपति डोनाल्ड ट्रम्पले चिनियाँ वस्तुहरूमा उच्च भन्सार शुल्क लगाएकोपछिको पहिलो उच्चस्तरीय छलफल हो। ट्रम्पले चीनबाट आयात हुने सामानमा १४५ प्रतिशतसम्म कर लगाएका थिए भने चीनले पनि अमेरिकी वस्तुहरूमा १२५ प्रतिशतसम्म भन्सार शुल्क लगाएको थियो।
यी भारी करहरूले अन्तर्राष्ट्रिय वित्तीय बजारमा अस्थिरता निम्त्याएको र विश्वव्यापी आर्थिक मन्दीको जोखिम बढाएको विश्लेषण गरिएको थियो।
सम्झौता अनुसार अब ९० दिनका लागि अमेरिका चीनबाट हुने आयातमा भन्सार शुल्क ३० प्रतिशतमा झार्नेछ भने चीनले अमेरिकी वस्तुहरूमा लगाइएको कर १० प्रतिशतमा घटाउनेछ।
यो अस्थायी निर्णयले दुई ठूला अर्थतन्त्रबीचको व्यापार युद्ध शान्त पार्ने संकेत दिएको छ।
प्रकाशित मिति: २९ बैशाख २०८२, सोमबार
प्रतिक्रिया