काठमाडौं । काठमाडौंको बागबजारस्थित एक गेस्ट हाउसमा २०८१ चैत २९ गते एक महिलाको हत्या भएको घटनामा संलग्न व्यक्तिलाई प्रहरीले पक्राउ गरेको छ।
नुवाकोटको सूर्यगढी नगरपालिका स्थायी घर भई काठमाडौंको काभ्रेस्थलीमा बसोबास गर्दै आएकी २८ वर्षीया विमला तामाङ मृत अवस्थामा फेला परेकी थिइन्। घटनाको ११ दिनपछि उनको शव सडेगलेको अवस्थामा भेटिएको हो।
यस घटनामा संलग्न रहेको आरोपमा धादिङको गल्छी गाउँपालिका स्थायी घर भएका ४० वर्षीय रामचन्द्र पन्तलाई प्रहरीले पक्राउ गरेको छ। जिल्ला प्रहरी परिसर काठमाडौंका प्रमुख एसपी अपिल बोहराका अनुसार, पन्त पूर्व भारतीय सैनिक हुन् र हाल भारतीय सेनाबाट पेन्सन लिँदै आइरहेका छन्।
प्रहरीका अनुसार, रामचन्द्र र विमला विवाहबाहेकको सम्बन्धमा थिए। बागबजारको गेस्ट हाउसमा विमलाको हत्या गरेपछि पन्त फरार भएका थिए। मंगलबार भारतबाट नेपाल फर्किँदै गर्दा उनलाई नागढुंगामा पक्राउ गरिएको प्रहरीको भनाइ छ।
घटनाको अनुसन्धान प्रहरी वृत्त सिंहदरबारमार्फत अघि बढाइएको छ।
प्रकाशित मिति: ३१ बैशाख २०८२, बुधबार
प्रतिक्रिया