काठमाडौँ । त्रिभुवन अन्तर्राष्ट्रिय विमानस्थलको अध्यागमन कार्यालयका प्रमुख सहसचिव तीर्थराज भट्टराईको मोबाइल अख्तियार दुरुपयोग अनुसन्धान आयोगले जफत गरेको छ। गृह मन्त्रालयमा तानिएका भट्टराईलाई नियन्त्रणमा लिएर आयोगले मोबाइल बरामद गरेको हो।
अख्तियारका एक उच्च स्रोतका अनुसार, जफत गरिएको मोबाइल परीक्षणका लागि डिजिटल फरेन्सिक ल्याब (DFL) मा पठाइनेछ। स्रोतले जानकारी दिँदै भने, “मोबाइल परीक्षणपछि अन्य वरिष्ठ अधिकारीहरूको संलग्नताबारे पनि प्रष्ट हुने छ।”
अख्तियारले भिजिट भिसा प्रकरणमा संलग्न भएको आशंकामा केही मेनपावर कम्पनी र ट्राभल एजेन्सीहरूमा छापा मारेर त्यहाँबाट विभिन्न डिजिटल उपकरणहरू पनि बरामद गरेको छ। ती सबै उपकरणहरू पनि फरेन्सिक परीक्षणका लागि तयारी अवस्थामा राखिएको जनाइएको छ। “सभी डिभाइसको फरेन्सिक रिपोर्ट प्राप्त भएपछि थप अनुसन्धान अघि बढ्नेछ,” अधिकारीले बताए।
हालै भिजिट भिसाको नाममा खाडी मुलुक गएका ४७ नेपाली महिला नेपाल फर्किन सकेका छैनन्। अध्यागमन विभागले विदेश जानेहरूको विवरण राखे पनि फर्कनेहरूको ठोस रेकर्ड नराखिएको पाइएको छ।
विभागसँग २०२४ सालमा नेपालबाट विदेश गएका यात्रुहरूको एकीकृत तथ्याङ्क मात्र रहेको छ। उक्त वर्ष तीर्थ यात्रा र भ्रमणका लागि १ लाख ५९ हजार ०४३ पुरुष र १ लाख १५ हजार ३५६ महिला विदेश गएका थिए। तर तीमध्ये कति जना फर्किए भन्ने जानकारी विभागले अझै संकलन गरिरहेको छ।
मानव तस्कर समूहसँग मिलेर अध्यागमनका केही कर्मचारीले विदेश पठाइएका यात्रुहरूसँग आर्थिक असुली बढाउन ‘सर्कुलर’को माध्यमबाट सूचना प्रवाह गर्दै आएको पाइएको छ। २०८१ चैत ३१ गते ह्वाट्सएपमार्फत पठाइएको एक सूचना अनुसार, “आइतबारदेखि भिजिट भिसामा जाने केही यात्रुलाई प्रस्थान अनुमति नदिइने” उल्लेख गरिएको थियो। यस्तो सूचना रकम बढाउनकै लागि गरिएको दाबी विमानस्थलका एक अधिकारीले गरेका छन्।
वर्तमानमा त्रिभुवन विमानस्थलको अध्यागमन कार्यालयमा १२८ जना अधिकारी कार्यरत छन्। यसअघि, २०८० मंसिरमा उपत्यका अपराध अनुसन्धान कार्यालयले फर्जी कागजातमार्फत भिजिट भिसामा व्यक्तिहरूलाई विदेश पठाएको आरोपमा अधिकृत नरवीर खड्कासहित ९ जना अध्यागमन कर्मचारीविरुद्ध मुद्दा दायर गरेको थियो। तीमध्ये विमल पौडेल, ताराबहादुर कुँवर, कुशल बराल, शैलेन्द्र ढकाल, विष्णु अर्याल, विकास डङ्गोल, पीताम्बर रिमाल र सुजन फागोले सफाइ पाएपछि पुनः ‘सेटिङ’ सक्रिय भएको भन्ने आरोप उठेको छ।
प्रहरी अनुसन्धान अनुसार, ती अधिकारीहरू अध्यागमन कार्यालयमा कार्यरत रहँदा भिजिट भिसाको नाममा यात्रु पठाउने गिरोहसँग मिलेमतो गरी आर्थिक लाभ लिएको पुष्टि भएको थियो।
यस प्रकरणमा अख्तियारको अनुसन्धान अझ व्यापक र गहिरो बन्दै गएको छ।
प्रकाशित मिति: ८ जेष्ठ २०८२, बिहिबार
प्रतिक्रिया