काठमाडौं । उत्तर कोरियाका सर्वोच्च नेता किम जोङ उनले बिहीबार नयाँ युद्धपोतको प्रक्षेपणको क्रममा भएको ‘गम्भीर दुर्घटना’लाई “असह्य आपराधिक कार्य” भन्दै कडा आलोचना गरेका छन्। राज्य सञ्चालित मिडियाले जनाएअनुसार, झण्डै ५,००० टन तौल भएको उक्त विनाशकारी युद्धपोतको तल्लो भाग च्यापिँदा जहाज असन्तुलित भएको थियो।
किम स्वयम् प्रक्षेपण समारोहमा उपस्थित थिए र उनले उक्त जहाजलाई आगामी जुन महिनामा बस्ने पार्टीको महत्वपूर्ण बैठकअघि पुनः मर्मत गरी तयार पार्न निर्देशन दिएका छन्। साथै, उनले युद्धपोतको डिजाइनमा संलग्न सम्पूर्ण जिम्मेवार व्यक्तिहरूलाई कारबाहीको दायरामा ल्याउन आदेश दिएका छन्। किमले भने, “यो घटनाले एकै झट्कामा हाम्रो राष्ट्रको गरिमा र गौरवमा गम्भीर क्षति पुर्याएको छ।”
दुर्घटनामा मानवीय क्षति भएको वा नभएकोबारे राज्य मिडियाले कुनै जानकारी दिएको छैन।
पूर्वी तटको चोङजिन बन्दरगाहस्थित एक जलयान कारखानामा यो दुर्घटना भएको हो। किमले दुर्घटनाको कारण “पूर्ण लापरवाही, गैरजिम्मेवारीपन र अवैज्ञानिक अनुभववाद” भएको बताएका छन्। साथै, उनले दोषीहरूमाथि आगामी महिनाको पार्टी बैठकमा औपचारिक रूपमा कारबाही गरिने बताएका छन्।
दण्डको स्वरूप कस्तो हुने स्पष्ट नभए पनि उत्तर कोरियाको मानवअधिकार स्थितिलाई लिएर विगतमा गम्भीर आलोचना हुँदै आएको छ। मानव अधिकारकर्मीहरूका अनुसार त्यहाँ सामान्य गल्ती वा मामुली कार्यहरू – जस्तै दक्षिण कोरियाको डिभिडी हेर्नु वा देश छोड्न खोज्नु – का लागि समेत जेल सजाय हुन सक्छ।
उत्तर कोरियाले यस किसिमका आन्तरिक दुर्घटनाहरू विरलै सार्वजनिक गर्ने गरेको छ। यद्यपि, पछिल्ला केही वर्षमा उसले केही घटनाहरू सार्वजनिक रूपमा स्वीकार गरेको छ। सन् २०२३ को नोभेम्बरमा, उसले ६ महिनाअघि भएको सैन्य उपग्रह विस्फोटलाई “गम्भीर असफलता” भनी स्वीकारेको थियो र त्यसमा संलग्न अधिकारीहरूलाई गैरजिम्मेवार ठहराएको थियो। त्यसै वर्षको अगस्टमा अर्को उपग्रह प्रक्षेपण असफल भएपछि “आपतकालीन इन्जिन प्रणालीमा त्रुटि” देखिएको बताइएको थियो, तर उक्त त्रुटिलाई “ठूलो समस्या होइन” भनिएको थियो।
बिहीबारको दुर्घटना केही हप्ता अघि उत्तर कोरियाले पश्चिमी तटबाट ५,००० टन क्षमताको अर्को युद्धपोत सार्वजनिक गरेपछि आएको हो। उक्त युद्धपोत ७० भन्दा बढी क्षेप्यास्त्र बोक्न सक्ने बताइएको थियो। किमले उक्त युद्धपोतलाई आफ्नो नौसैनिक शक्तिको आधुनिकीकरणमा “ऐतिहासिक प्रगति” को रूपमा व्याख्या गरेका थिए र यसलाई आगामी वर्षको सुरुवातदेखि तैनाथ गरिने बताएका थिए।
प्रकाशित मिति: ८ जेष्ठ २०८२, बिहिबार
प्रतिक्रिया