एजेन्सी । हमासको गाजा प्रमुख मोहम्मद सिनवारको शव फेला पारेको र पहिचान गरेको इजरायली सेनाले बताएको छ । सिनवारको शव गाजाको दक्षिणमा रहेको खान युनिसमा रहेको युरोपेली अस्पताल मुनिको सुरुङमा फेला परेको आइतबार इजरायली रक्षा बल (आईडीएफ)ले बताएको हो ।
डीएनए परीक्षण मार्फत सिनवारको शव पहिचान गरेको बताइएको छ । तर, हमासले अहिलेसम्म सिनवारको मृत्युको सार्वजनिक रूपमा पुष्टि गरेको छैन । हमासद्वारा सञ्चालित नागरिक रक्षा एजेन्सीका अनुसार मे १३ मा भएको हवाई आक्रमणमा ४९ वर्षीय सिनवारको मृत्यु भएको थियो ।
यस आक्रमणमा परेर २८ जनाको मृत्यु भएको थियो । अन्य कयौँ घाइते भएका थिए । हमासको रफाह ब्रिगेडका कमान्डर मोहम्मद सबानेहको शव पनि सिनवारको शव नजिकै फेला परेको आईडीएफले बताएको छ ।
‘सिनवार र सबानेहसँग सम्बन्धित धेरै वस्तुहरू फेला परेको र साथै केही अन्य गुप्तचर जानकारीहरू पनि फेला पारिएको अझ अगाडि आईडीएफले भनेको छ । यी सबैलाई थप अनुसन्धानको लागि पठाइएको भनिएको छ ।
आक्रमण स्थलमा अन्य शवहरू पनि फेला परेका छन् । जसको पहिचान भइरहेको बताइएको छ ।
प्रकाशित मिति: २६ जेष्ठ २०८२, सोमबार
प्रतिक्रिया