एजेन्सी । भारतको अमरोहा जिल्लास्थित अतरासी गाउँको जङ्गली क्षेत्रमा सञ्चालित एक पटाका फ्याक्ट्रीमा सोमबार अचानक विस्फोट हुँदा कम्तीमा चार जनाको मृत्यु भएको छ भने नौ जना घाइते भएका छन् ।
यो शक्तिशाली विस्फोटका कारण फ्याक्ट्रीको भवन र त्यसको टिनको छाना भत्किएको थियो । घाइतेमध्ये दुई जनाको अवस्था गम्भीर रहेको बताइएको छ। उनीहरूलाई थप उपचारका लागि मुरादाबादको उच्चस्तरीय स्वास्थ्य केन्द्रमा रेफर गरिएको छ । बाँकी घाइतेहरूको अमरोहास्थित अस्पतालहरूमा उपचार भइरहेको छ ।
प्रहरी र प्रशासनिक अधिकारीहरूले अनुसन्धान सुरु गरेका छन् र भग्नावशेषमा पुरिएका कामदारहरूलाई बाहिर निकाल्न उद्धार कार्यमा जुटेका छन् । मृतक सबै महिला भएका अधिकांश घाइते पनि महिला नै दुर्घटनास्थलमा खटिएका प्रहरीले बताएका छन् ।
विस्फोटको ठुलो आवाज गाउँलेहरूले सुनेर प्रहरीलाई खबर गरेका थिए । भवनको भग्नावशेषमा एक दर्जनभन्दा बढी मजदुर पुरिएपछि गाउँलेहरूमा रुवाबासी चलेको थियो ।
सूचना पाएलगत्तै स्थानीय प्रहरी र दमकल घटनास्थल पुगेर आगो नियन्त्रणमा लिई उद्धार थालेका थिए । मृतक र घाइतेहरूलाई भग्नावशेषबाट बाहिर निकालिएको थियो । चार महिला मजदुरको घटनास्थलमै मृत्यु भएको घाइतेहरूको अवस्था पनि गम्भीर रहेको बताइएको छ ।
पटाका प्याकिङ र उत्पादन गर्ने यो फ्याक्ट्री एउटा खेतमा दुई वटा भवनमा सञ्चालित छ । जसमध्ये एउटा भवनमा विस्फोट भएको हो । अमरोहाकी जिल्ला मजिस्ट्रेट निधि गुप्ता वत्स र प्रहरी उपरीक्षक अमित कुमार आनन्द घटनास्थल पुगेर विस्फोट भएको ठाउँको निरीक्षण गरेका थिए ।
अमरोहाका प्रहरी उपरीक्षक अमित कुमार आनन्दका अनुसार बिहान करिब ११ बजेर ५० मिनेटतिर विस्फोटको खबर आएको र प्रहरी र दमकल तुरुन्तै घटनास्थल पुगेको थियो । विस्फोटको कारण भने खुल्न नसकेको प्रहरीले जनाएको छ ।
प्रकाशित मिति: २ असार २०८२, सोमबार
प्रतिक्रिया