काठमाडौं । राष्ट्रिय स्वतन्त्र पार्टी (रास्वपा) ले भिजिट भिसा तथा मानव बेचबिखनसँग सम्बन्धित संगठित अपराधमा संलग्नहरूबारे छानबिन गर्न सत्तारुढ दलहरूसँग पुनः आग्रह गरेको छ। पार्टी प्रवक्ता तथा सांसद मनिष झाले मङ्गलबार संघीय संसद् परिसरमा सञ्चारकर्मीहरूसँग कुरा गर्दै पार्टीको माग स्पष्ट रूपमा राखे।
उनले विगत १८ वर्षदेखि नेपालीहरू ठगिंदै आएको उल्लेख गर्दै अब भने सो प्रवृत्तिको अन्त्य हुनुपर्नेमा जोड दिए। “यो माग केवल हाम्रो हैन, जनताको हो,” सांसद झाले भने, “अब नेपालीहरू ठगिनु हुँदैन भनेर हामी आन्दोलनमा छौँ।”
उनले सत्तारुढ दलहरूले ल्याएका विभिन्न विधेयकहरूलाई रास्वपाले राजनीतिक रूपमा समर्थन गर्न तयार रहेको स्पष्ट पारे। तर, सो सन्दर्भमा आफूहरूले उठाएको गम्भीर विषय—भिजिट भिसा दुरुपयोग र मानव बेचबिखन—प्रति पनि सत्ता पक्षले गम्भीरता देखाउनुपर्ने उनले बताए।
“हामी राजनीतिक सहकार्यका लागि तयार छौँ,” उनले भने, “तर त्यसैगरी तपाईंहरूले पनि हाम्रो माग अनुसार भिजिट भिसा र मानव बेचबिखनसम्बन्धी संगठित अपराधमा संलग्नहरूबारे उच्चस्तरीय छानबिन आयोग, न्यायिक समिति वा संसदीय विशेष छानबिन समिति गठन गर्नुपर्छ।”
भिजिट भिसा प्रकरणमा गृहमन्त्री रमेश लेखकको नाम जोडिएपछि रास्वपाले मन्त्रीको राजीनामाको मागसहित संसद् लगातार अवरुद्ध गर्दै आएको छ।
सांसद झाले भने, “हामीले राखेको माग गम्भीर र जनभावनासँग जोडिएको छ। १८ वर्षदेखि ठगिंदै आएका नेपालीहरूको पीडा अब अन्त्य हुनुपर्छ। त्यसैले हाम्रो आग्रह छ—हाम्रो आवाज सुन्नुहोस् र छानबिनका लागि आवश्यक प्रक्रिया तत्काल सुरु गर्नुहोस्।”
रास्वपाले विगतका गलत अभ्यासहरू दोहोरिन नदिन सशक्त र निष्पक्ष छानबिनको माग गर्दै आन्दोलनलाई अझ सशक्त बनाउने चेतावनी पनि दिएको छ।
प्रकाशित मिति: ३ असार २०८२, मंगलबार
प्रतिक्रिया