काठमाडौं । इरानमा अलपत्र परेका नेपाली नागरिकहरूको उद्धारमा भारतले सहयोग गर्ने भएको छ। इरानस्थित भारतीय दूतावासले सामाजिक सञ्जाल ‘एक्स’ (पूर्व ट्विटर) मार्फत उक्त जानकारी सार्वजनिक गरेको हो।
भारतले नेपाल र श्रीलङ्काको आग्रहमा आफ्ना उद्धार अभियानमा यी दुई देशका नागरिकलाई पनि समावेश गर्ने बताएको छ। दूतावासले लेखेको छ, “नेपाल र श्रीलङ्का सरकारको अनुरोधमा इरानस्थित भारतीय दूतावासद्वारा सञ्चालित उद्धार प्रयासमा अब नेपाली तथा श्रीलङ्काली नागरिकहरूलाई पनि समेटिनेछ।”
दूतावासले इरानमा रहेका नेपाली र श्रीलङ्काली नागरिकहरूलाई सकेसम्म चाँडो सम्पर्क गर्न अनुरोध गर्दै आपतकालीन सम्पर्क नम्बरहरू पनि सार्वजनिक गरेको छ। सम्पर्कका लागि टेलिग्राम च्यानल वा तल उल्लेखित फोन नम्बर प्रयोग गर्न सकिनेछ:
📞 +९८९०१०१४४५५७
📞 +९८९१२८१०९११५
📞 +९८९१२८१०९१९
इरान र इजरायलबीच बढ्दो तनावका कारण इरानमा रहेका विदेशी नागरिकहरूको सुरक्षाका लागि भारतले ‘अपरेसन सिन्धु’ नामक उद्धार अभियान सञ्चालनमा ल्याएको हो। उक्त अभियान अन्तर्गत भारतीय नागरिकहरूसँगै नेपाली र श्रीलङ्काली नागरिकको पनि सुरक्षित उद्धार गरिनेछ।
प्रकाशित मिति: ७ असार २०८२, शनिबार
प्रतिक्रिया