काठमाडौं । राष्ट्रिय स्वतन्त्र पार्टी (रास्वपा)का सांसदहरू प्रतिनिधि सभाको बैठकबाट बैठक चलिरहेको अवस्थामै बाहिरिएका छन्।
भिजिट भिसा प्रकरणमा गृहमन्त्रीको राजीनामाको माग गर्दै सदन अवरुद्ध गर्दै आएको रास्वपाले, आइतबारको बैठकमा पनि सरकारको अडानप्रति असन्तुष्टि जनाउँदै बैठक बहिष्कार गरेका हुन्।
बैठकका क्रममा वेल घेराउ गर्दै विरोधमा उत्रिएका रास्वपाका सांसदहरू प्रतिपक्षी सांसदहरूको धारणा सुनेपछि बैठक स्थलबाट बाहिरिएको रास्वपाका कार्यवाहक प्रवक्ता मनिष झाले जानकारी दिए।
उनले भने, “प्रतिपक्षीका १६ जना सांसदको आवाज सुनेपछि हामी निस्कियौं। दुई तिहाइको अहंकारी आवाज सुन्नु आवश्यक ठानेनौं।”
रास्वपाले भिजिट भिसा सम्बन्धी अनियमितताको छानबिनका लागि संसदीय समिति गठनको माग राख्दै आएको छ। तर, सरकार त्यसप्रति गम्भीर नभएको भन्दै रास्वपाले निरन्तर विरोध जारी राखेको हो।
रास्वपाका अनुसार माग सुनुवाइ नभएसम्म संसद्मा उनीहरूको विरोध कायमै रहनेछ।
प्रकाशित मिति: ७ असार २०८२, शनिबार
प्रतिक्रिया