काठमाडौं । नेपाली कांग्रेसका नेता तथा प्रवक्ता डा. प्रकाशशरण महतले एकपटक राष्ट्रपति बनेको व्यक्तिले पुनः सक्रिय राजनीतिमा फर्किनु उपयुक्त नहुने स्पष्ट पारेका छन्।
आइतबार पार्टी सभापति शेरबहादुर देउवाको निवास बूढानीलकण्ठमा बसेको कांग्रेस पदाधिकारी तथा पूर्वपदाधिकारीहरूको बैठकपछि सञ्चारकर्मीहरूसँग कुरा गर्दै उनले पूर्वराष्ट्रपति विद्यादेवी भण्डारीको सक्रिय राजनीतिमा पुनः फर्किएको घोषणाप्रति टिप्पणी गर्दै यस्तो धारणा राखेका हुन्।
“राष्ट्रपतिका रूपमा राष्ट्रको सर्वोच्च पद सम्हालेको व्यक्तिले त्यो पदको मर्यादा कायम राख्नुपर्ने हुन्छ,” डा. महतले भने, “त्यसैले कांग्रेस पार्टीको स्पष्ट मान्यता छ— पूर्वराष्ट्रपतिलाई फेरि पार्टीको सक्रिय भूमिकामा ल्याउनु उपयुक्त हुँदैन।”
उनले राष्ट्रपतिको पद कुनै पनि दलको होइन, समग्र राष्ट्रको प्रतिनिधित्व गर्ने संवैधानिक संस्था भएको उल्लेख गर्दै भने, “एकचोटि राष्ट्रको साझा नेतृत्व सम्हालेपछि पुनः कुनै दल विशेषको पक्षमा उभिनु पदको गरिमा विपरीत हुन्छ।”
नेकपा एमालेको शनिबारको कार्यक्रममा भाग लिँदै पूर्वराष्ट्रपति भण्डारीले राजनीतिक पुनःसक्रियताको संकेत दिएकी थिइन्। त्यसपछि देशको राजनीतिक वृत्तमा चासो र बहसको विषय बनेको हो।
डा. महतले भने, “हामी कांग्रेसमा त्यो संस्कार छैन— राष्ट्रपतिको गरिमा जोगाउने विषयमा हामी सबै गम्भीर छौं।”
प्रकाशित मिति: १५ असार २०८२, आइतबार
प्रतिक्रिया