वासिङ्टन । अमेरिकी पूर्वराष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनसँग युक्रेन युद्ध अन्त्यका विषयमा भएको फोनवार्ता कुनै प्रगतिको अनुभूति बिना सम्पन्न भएको बताएका छन्।
हालैको पत्रकार सम्मेलनमा ट्रम्पले पुटिनसँग करिब एक घण्टा लामो फोन संवाद भएको जानकारी दिँदै भने, “हामीबीच इरानसहित विभिन्न विषयमा विस्तृत छलफल भयो। युक्रेन युद्धबारे पनि कुरा गर्यौँ, तर म छलफलको नतिजाबाट सन्तुष्ट छैन।” उनले स्पष्ट रूपमा भने, “मैले कुनै प्रगति भएको महसुस गरेन।”
ट्रम्पको यो अभिव्यक्ति अमेरिकाले किएभतर्फको हतियार आपूर्ति रोकिएको सन्दर्भसँग पनि जोडिएको छ। उनले अमेरिकी नेतृत्वको शान्ति प्रयासमा अवरोध देखिएको गम्भीर संकेत दिएका छन्।
पूर्वराष्ट्रपति ट्रम्पले यसअघि पुटिनसँग भएका पाँचपटकका संवादपछि केही आशाको संकेत दिएका थिए। तर, पछिल्लो वार्तापछि भने उनले युद्ध अन्त्यमा रूसी धारणा र उद्देश्यप्रति निराशा व्यक्त गरेका छन्।
इरान–इजरायल द्वन्द्वमा मध्यस्थता गर्न पुटिनले अघि सारेको प्रस्तावलाई अस्वीकार गर्दै ट्रम्पले उनलाई युक्रेन युद्धमै केन्द्रित हुन सुझाव दिएको पनि खुलासा गरेका छन्।
त्यसैबीच, क्रेमलिनका स्रोतअनुसार वार्ताको क्रममा पुटिनले युक्रेन युद्धमा रुसी लक्ष्यहरू यथावत् रहने स्पष्ट पारेका थिए। क्रेमलिनका सहयोगी युरी उशाकोभले भने, “राष्ट्रपतिले रुसले तय गरेका लक्ष्यहरू हासिल गरिन्छन् भन्ने अडान व्यक्त गर्नुभयो। ती लक्ष्य त्यागिने छैनन्।”
रुसले युक्रेनमाथिको आक्रमणलाई आफ्नो रणनीतिक लक्ष्यसँग जोड्दै आए पनि किएभले नाटो सदस्यता प्राप्त गर्ने आकांक्षा त्याग्न अस्वीकार गर्दै आएको छ, जुन द्वन्द्वको प्रमुख कारणका रूपमा देखिन्छ।
प्रकाशित मिति: २० असार २०८२, शुक्रबार
प्रतिक्रिया