काठमाडौं । भैरहवा कारागारमा रहेका राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेको पक्षमा हस्ताक्षर गरेको आरोपमा ट्राफिक प्रहरी सई कमल खड्कालाई जिम्मेवारीबाट हटाइएको छ।
नेपालगञ्जमा कार्यरत सई खड्कालाई नेपाल प्रहरीको केन्द्रीय कार्यालय (हेडक्वाटर) तानिएको प्रहरी प्रवक्ता डीआईजी विनोद घिमिरेले पुष्टि गरेका छन्। उनका अनुसार, हस्ताक्षर प्रकरणबारे स्पष्ट जानकारी लिन खड्कालाई हेडक्वाटर झिकाइएको हो।
सहकारी ठगी अभियोगमा थुनामा रहेका लामिछानेको समर्थनमा राष्ट्रिय स्वतन्त्र पार्टीले ‘नागरिक हस्ताक्षर अभियान’ सञ्चालन गरिरहेको छ। सोही अभियानमा सई खड्काले समेत हस्ताक्षर गरेको फोटो सामाजिक सञ्जालमा भाइरल बनेपछि उनी छानबिनमा तानिएका हुन्।
यस प्रकरणलाई कतिपयले राजनीतिक प्रतिशोधको रूपमा पनि व्याख्या गरिरहेका छन्।
प्रकाशित मिति: २० असार २०८२, शुक्रबार
प्रतिक्रिया