काठमाडाैं । अमेरिकी राष्ट्रपति डोनाल्ड ट्रम्पले युक्रेनमा जारी युद्धका कारण रूसमाथि थप प्रतिबन्ध लगाउने विषयमा विचार गरिरहेको बताएका छन्।
ह्वाइट हाउसमा मंगलबार आयोजित मन्त्रीपरिषद् बैठकमा बोल्दै ट्रम्पले अमेरिकी सिनेटमा पेश भएको नयाँ प्रतिबन्धसम्बन्धी विधेयकलाई समर्थन गर्ने कि नगर्ने भन्ने विषयमा आफू गम्भीर सोचमा रहेको बताएका हुन्।
उक्त विधेयकमा रूसबाट ऊर्जा आयात गर्ने देशहरूमा भारी शुल्क लगाउने तथा रूसी ऊर्जा उत्पादनलाई समर्थन गर्ने विदेशी कम्पनीहरूलाई पनि प्रतिबन्धको दायरामा ल्याउने प्रस्ताव गरिएको छ।
यसैबीच, ट्रम्पले युक्रेनलाई दिइँदै आएको रक्षात्मक हतियार सहायता अस्थायी रूपमा रोकिएको भए पनि अब पुनः सुरु गर्न स्वीकृति दिइएको जानकारी पनि दिएका छन्। अमेरिकी रक्षा विभागले हतियार तयारी र वितरणको पुनः समीक्षा गरेपछि यो निर्णय लिएको बताइएको छ।
ट्रम्पको भनाइले अमेरिका–रूस सम्बन्धमा थप चिसोपन आउन सक्ने संकेत देखिएको छ।
प्रकाशित मिति: २५ असार २०८२, बुधबार
प्रतिक्रिया