काठमाडाैं । नेकपा (एमाले) का सचिव लेखराज भट्टले पार्टी अध्यक्ष तथा प्रधानमन्त्री केपी शर्मा ओलीको प्रशंसा गरेका छन्। शुक्रबार कञ्चनपुरको महेन्द्रनगरमा आयोजित प्रेस चौतारी नेपाल, सुदूरपश्चिम प्रदेशस्तरीय प्रशिक्षण तथा दोस्रो पूर्ण बैठकमा भट्टले ओलीप्रति उच्च सम्मान व्यक्त गरे।
भट्टले ओलीलाई समर्थन गर्ने कुरालाई देवत्वकरण भन्न नमिल्ने बताए। उनले ओलीसँग अद्भुत क्षमता रहेको उल्लेख गर्दै भने, “ओलीलाई समर्थन गर्नु वर्तमान वस्तुस्थितिको परिणाम हो, कुनै व्यक्ति पूजा वा अन्धविश्वासबाट प्रेरित होइन। उहाँजस्तो मेहनती, सपना देख्ने र सक्रिय नेता नेपालमा अरू छैनन्।”
उनले एमालेलाई वैचारिक र सैद्धान्तिक रूपमा कम्युनिष्ट आन्दोलनको केन्द्र बनाएको दाबी गर्दै पार्टीलाई शक्ति, संगठन र जनसमर्थनका आधारमा ‘एक नम्बर’ पार्टीको रुपमा रहेको बताए।
साथै, भट्टले एमालेभित्र केही समस्या विद्यमान रहेको स्वीकार गर्दै ती समस्याको सुधारका लागि सबै नेता तथा कार्यकर्तालाई सक्रिय भएर काम गर्न आह्वान गरेका छन्।
प्रकाशित मिति: २३ श्रावण २०८२, शुक्रबार
प्रतिक्रिया