काठमाडौं । राष्ट्रपति रामचन्द्र पौडेलले वर्तमान राजनीतिक व्यवस्थालाई आधार मानेर मुलुकको भाग्य र भविष्य निर्माणमा युवाहरूले निर्णायक भूमिका निर्वाह गर्नुपर्ने बताएका छन्।
अन्तर्राष्ट्रिय युवा दिवसको अवसरमा मंगलबार काठमाडौंमा आयोजित कार्यक्रममा राष्ट्रपतिले समृद्ध नेपाल निर्माणका लागि युवाहरूले युगीन जिम्मेवारी निभाउन सक्ने विश्वास व्यक्त गरे।
उनले युवालाई उद्यमशीलता र स्वरोजगारतर्फ अग्रसर हुनुपर्ने वर्तमान समयको महत्वपूर्ण आवश्यकता भएको उल्लेख गर्दै भने, “अहिले यही राजनीतिक व्यवस्थाको आधारमा उभिएर मुलुकको भाग्य र भविष्य निर्माण गर्दै समृद्ध नेपाल बनाउने जिम्मेवारी तपाईंहरूको काँधमा छ। तपाईंहरू त्यस जिम्मेवारी पूरा गर्न पूर्ण रूपमा सक्षम हुनुहुन्छ।”
राष्ट्रपतिले आधुनिक विश्वव्यापीकरण र प्रविधिको तीव्र विकासको युगमा युवा पुस्ताले सुशासन र समृद्धिको सपना साकार पार्नु आजको मुख्य दायित्व रहेको पनि बताए।
विदेश पलायन रोक्न र युवालाई स्वदेशमै रोजगारीका अवसर तर्फ आकर्षित गर्न उद्यमशीलता प्रवर्द्धन गर्ने नीति तथा कार्यक्रमलाई सरकारले उच्च प्राथमिकतामा राखेको उनले बताए।
प्रविधिमा दक्ष युवा वर्गलाई लक्षित गर्दै सरकारले सहुलियतपूर्ण कर्जा, युवामैत्री लगानी वातावरण निर्माण, नवप्रवर्तन तथा उद्यमशीलताको विकासमा विशेष जोड दिएको राष्ट्रपतिले उल्लेख गरे।
प्रकाशित मिति: २७ श्रावण २०८२, मंगलबार
प्रतिक्रिया