काठमाडौँ । प्रतिनिधि सभाको बिहीबारको बैठकमा सांसदहरूले राज्य व्यवस्था तथा सुशासन समितिका सभापति रामहरि खतिवडाले नैतिकताका आधारमा दिएको राजीनामालाई स्वागतयोग्य ठहराएका छन्। उनीहरूले यसले संसद्मा उदाहरण कायम गर्ने विश्वास व्यक्त गरे।
राष्ट्रिय प्रजातन्त्र पार्टी (राप्रपा) का सांसद ध्रुवबहादुर प्रधानले भने, “खतिवडाको राजीनामाले सकारात्मक सन्देश दिएको छ। तर भिजिट भिसा प्रकरणमा गृहमन्त्री रमेश लेखकमाथि उठेका प्रश्नहरू समाधान गर्न न्यायिक छानबिन समिति गठन आवश्यक छ। यदि कानुनी अनियमितता रोक्न सकिन्छ भने मात्रै सदन बहिष्कारको अवस्था टार्न सकिन्छ।”
रास्वपाकी सांसद डा. चन्दा कार्कीले भने, “कुलिङ अफ पिरियडमा भएको त्रुटिसम्बन्धमा खतिवडाले राजीनामा दिएको सकारात्मक भए पनि, दुई महिनादेखि जारी आन्दोलनको बावजुद अनियमितता रोक्न सरकारले न्यायिक समिति गठन गर्न सकेको छैन। प्रधानमन्त्री केपी शर्मा ओलीले पार्टी सभापति रवि लामिछानेविरुद्ध दिएको अभिव्यक्ति आपत्तिजनक छ। अदालतको फैसला सरकारले जिम्मा लिन नसक्नु उचित होइन। राज्यको हस्तक्षेप भएपछि स्वतन्त्र न्यायपालिका कसरी सुनिश्चित हुन्छ भन्ने विषयमा म सदनमार्फत ध्यानाकर्षण गराउन चाहन्छु।”
सांसदहरूले गृहमन्त्री लेखकमाथि पनि पाठ सिक्नुपर्ने सुझाव दिएका छन्।
प्रकाशित मिति: २९ श्रावण २०८२, बिहिबार
प्रतिक्रिया