काठमाडौं । खाडी देश कुवेतमा विषाक्त मदिरा सेवनका कारण ६ जना नेपालीको मृत्यु भएको छ भने ३५ जना घाइते नेपाली विभिन्न अस्पतालमा उपचाररत छन्। घाइतेहरूलाई कुवेतका ६ वटा अस्पतालमा भर्ना गरिएको छ।
कुवेतस्थित नेपाली दूतावासका अनुसार, कुवेतको परराष्ट्र तथा स्वास्थ्य मन्त्रालयले यस घटनाबारे दूतावासलाई जानकारी गराइसकेको छ। हालसम्म विषाक्त मदिरा सेवनका कारण कुवेतका विभिन्न अस्पतालमा ६३ जना विदेशी उपचाररत छन्, जसमा १३ जनाको मृत्यु भइसकेको छ। मृतकमध्ये ६ जना नेपाली रहेको पुष्टि दूतावास स्रोतले जनाएको छ।
कुवेतका लागि नेपाली राजदूत घनश्याम लम्सालले भने, “हामी निरन्तर कुवेतको परराष्ट्र र स्वास्थ्य मन्त्रालयसँग सम्पर्कमा छौँ। केही नेपालीको मृत्यु भएको र अन्यको उपचार भइरहेको जानकारी प्राप्त भएको छ। हामी घटनाको पुष्टि गर्ने प्रक्रियामा छौँ।”
कुवेतमा मदिरा सेवन कानुनी रूपमा प्रतिबन्धित छ। यद्यपि समय–समयमा नेपालीहरू लुकिछिपी मदिरा सेवन गर्ने घटना बाहिर आउँदै आएको छ। यसपटक विषाक्त मदिरा सेवनका कारण ६ जना नेपालीको मृत्यु भएको घटनाले पुनः चेतावनीको खाँचो देखाएको छ।
प्रकाशित मिति: ३० श्रावण २०८२, शुक्रबार
प्रतिक्रिया