काठमाडौं । सत्तारुढ नेपाली कांग्रेसकी सांसद रमा कोइराला ले कुवेतमा नेपाली श्रमिकको मृत्यु र गम्भीर बिरामी परेका घटनाबारे प्रतिनिधि सभालाई जानकारी गराउन माग गरेकी छन्।
बुधबार संसद् बैठकमा बोल्दै सांसद कोइरालाले कुवेतमा १२ जना नेपाली श्रमिकको मृत्यु भएको र केही गम्भीर रूपमा बिरामी भएर आइसियूमा उपचार भइरहेका नेपालीको अवस्था बुझ्न श्रममन्त्रीले सदनलाई विवरण दिनुपर्ने बताइन्।
उनले भने, “१२ जनाको निधन भयो। केही कामदार आइसियूमा छन्। कसैको किड्नी फेल भएको, कसैको आँखा बिग्रिएको छ। हिजोदेखि धरपकड सुरु भएको छ भन्ने कुरा सुनियो। यत्रो ठूलो घटना हुँदा हामी रेमिट्यान्स गन्न उद्वत छौं।”
सांसद कोइरालाले श्रमिकहरूलाई विदेश पठाउनुअघि अभिमुखीकरण तालिम दिने क्रममा जबरजस्ती पैसा असुलिने र आवश्यक जानकारी नदिइने कुरा पनि औँल्याइन्। “पैसा लिएर दिएको सर्टिफिकेट काम लागेन। तालिम दिँदा कुवेतमा रक्सी सेवन गर्न पाइँदैन भनेर जानकारी दिनुपर्छ कि पर्दैन? बारम्बार यस्ता घटना भइरहेका छन्। सरकार र श्रम मन्त्रालय के हेरेर बसेको छ? मेनपावर कम्पनीले दिनानुदिन श्रमिक ठगिरहँदा पनि?” उनले प्रश्न गरिन्।
सांसद कोइरालाले बिरामीका लागि सरकारले के-के गरिरहेको छ भन्ने विषयमा पनि सदनलाई स्पष्ट जानकारी दिन आग्रह गरे। उनले भनिन्, “श्रमिकहरूको लास कहिले नेपाल आउनेछ? बिरामीका लागि सरकारले के गरिरहेको छ भन्ने कुरा सदनलाई जानकारी गरिनुपर्छ।”
प्रकाशित मिति: ४ भाद्र २०८२, बुधबार
प्रतिक्रिया