नातावादको बिरोध गर्दै ओलीले भने- ‘मेरो भाइ १० कठ्ठा जमिनमा हलो जोत्छ, राजदूत छैन’

काठमाडौं । नेकपा एमालेका अध्यक्ष केपी शर्मा ओलीले आफू नातावादको पक्षपोषक नभएको बताएका छन्।

आइतबार काठमाडौंमा आयोजित एक कार्यक्रममा बोल्दै उनले आफ्नो भाइलाई राजदूत वा सांसद बनाउने कुनै मनसाय नरहेको बताएका हुन्।

‘मेरो भाइ राजदूत हुन खोज्यो, फलानो कमिटीमा जान खोज्यो भन्ने सुन्नुभएको छ? मेरो भाइ १० कठ्ठा जमिन लिएर हलो जोतेर बसेको छ,’ उनले भने।

आफूले भाइ, बहिनी श्रीमती वा सालोप्रति कुनै पदका निम्ति मरिहत्ते नगरेको उनले बताए। एमालेभित्र टिकट वितरणमा कुनै विभेद नहुने ओलीले प्रतिवद्धता जनाएका छन्।

‘एमालेभित्र टिकट वितरण क्षमतावानलाई हुनेछ। योग्यता पुगेकाहरूले टिकट पाउनेछन्। कसैप्रति भेदभाव हुनेछैन,’ उनले भने।

एमाले सन्तुलित  र दीगो विकासका एजेन्डा लिएर चुनावमा अघि बढ्ने ओलीको भनाइ छ।

प्रकाशित मिति: २९ श्रावण २०७९, आइतबार