काठमाडौं । पूर्वराष्ट्रपति विद्यादेवी भण्डारीले जेन–जी आन्दोलनका क्रममा घाइते भएका व्यक्तिलाई शुक्रबार अस्पतालमा भेटेकी छन् ।
भण्डारी नेपाल प्रहरी अस्पताल पुगेर घाइतेहरूको स्वास्थ्य अवस्था, उपचार प्रक्रिया र आवश्यक सहयोगका विषयमा जानकारी लिइन् । उनले उपचाररत बिरामीसँग प्रत्यक्ष कुराकानी गर्दै शीघ्र स्वास्थ्यलाभको शुभकामना दिइन् ।
अस्पतालमा उपस्थित चिकित्सकसँग पनि उनले घाइतेहरूको उपचारबारे जिज्ञासा राखेकी थिइन् । कुनै कसर बाँकी नराखी प्रभावकारी उपचार गर्नुपर्नेमा उनले जोड दिएकी छिन् ।
भदौ २३ र २४ गते भएको जेन–जेड प्रदर्शनमा ७४ जनाको मृत्यु भएको थियो भने धेरै जना घाइते भएका थिए । उनीहरू हाल काठमाडौंका विभिन्न अस्पतालमा उपचाररत छन् ।
उक्त घटनापछि बनेको अन्तरिम सरकारले मृतकलाई शहीद घोषणा गर्दै प्रत्येक परिवारलाई १० लाख रुपैयाँ क्षतिपूर्ति र अन्य खर्चबापत थप पाँच लाखसहित १५ लाख रुपैयाँ दिने निर्णय गरेको छ । यस्तै, घाइतेहरूको सम्पूर्ण उपचार खर्च सरकारकै जिम्मेवारीमा हुने जनाएको छ ।
प्रकाशित मिति: ३ आश्विन २०८२, शुक्रबार
प्रतिक्रिया