काठमाडौं । वेस्ट इन्डिजविरुद्ध तीन ट्वान्टी–२० शृंखला खेल्न नेपाली क्रिकेट टोलीलाई संयुक्त अरब इमिरेट्स (यूएई)ले भिसा प्रदान गरेको छ। नेपाल क्रिकेट संघ (क्यान)ले आइतबार जारी गरेको विज्ञप्तिमा यो जानकारी दिएको हो।
क्यानका प्रवक्ता छुम्बी लामाका अनुसार नेपाली टोली सोमबार यूएई प्रस्थान गर्नेछ। प्रारम्भमा टोली शुक्रबार यूएई जाने तालिका बनाएको थियो, तर भिसा नआएपछि यात्रा रोकिएको थियो।
यो निर्णय जेन–जी आन्दोलनपछि नयाँ सरकार गठन भएपछि यूएईले नेपाली नागरिकका लागि पर्यटक तथा कामदार भिसामा रोक लगाएको अवस्थामा आएको हो।
नेपाली टोली सेप्टेम्बर २७, २९ र ३० मा शारजहाँमा वेस्ट इन्डिजविरुद्ध तीन ट्वान्टी–२० खेल खेल्नेछ। त्यसपछि टोली ट्वान्टी–२० विश्वकप एसिया–प्यासिफिक छनोटमा प्रतिस्पर्धा गर्न ओमान जाने कार्यक्रममा रहेको छ।
मुख्य प्रशिक्षक स्टुवार्ट ल शुक्रबारै दुबई पुगेका छन् भने स्ट्रेन्थ एन्ड कन्डिसन प्रशिक्षक अब्दुर सतार भारतबाटै दुबई आउने कार्यक्रम छ।
प्रकाशित मिति: ५ आश्विन २०८२, आइतबार
प्रतिक्रिया