काठमाडौं । नवलपरासी कारागार कार्यालयले भागेका कैदीबन्दीलाईघरमा लुकाइछिपाइ वा आश्रय नदिन सर्वसाधारणसँग आग्रह गरेको छ।
गत भदौ २५ गते, जेनजी आन्दोलनपश्चात भएको घटनामा नवलपरासी कारागारबाट ५४६ जना कैदीबन्दी फरार भएका थिए। कारागार कार्यालयका अनुसार भागेका मध्ये केही कैदीबन्दी स्वयं कारागारमा आएर उपस्थित भइसकेका छन्।
कारागारका जेलर विकल श्रेष्ठका अनुसार भागेकाहरूमध्ये पुरुष २१९ र महिला ३२ गरी जम्मा २५१ जना अहिलेसम्म हाजिर भइसकेका छन्। अझै हाजिर नभएकालाई यही असोज २० गतेसम्म कारागारमा फर्किन आग्रह गरिएको छ।
जेलर श्रेष्ठले भने, ‘असोज २० गतेभित्र हाजिर नभएका कैदीबन्दीलाई कारागार ऐन, २०७९ तथा प्रचलित कानुनअनुसार कारबाही गरिनेछ।’
कारागार कार्यालयले भागेकाहरुलाई लुकाउने वा आश्रय दिने व्यक्तिलाई समेत कानुनी कारबाहीको दायरामा ल्याइने चेतावनी दिएको छ।
प्रकाशित मिति: १७ आश्विन २०८२, शुक्रबार
प्रतिक्रिया