वासिङ्टन डिसी । अमेरिकी राष्ट्रपति डोनाल्ड ट्रम्पले आफ्नो सेनाले भेनेजुएलाको तटबाट अन्तर्राष्ट्रिय जल क्षेत्रमा लागुऔषध तस्करी गर्ने जहाजमाथि आक्रमण गरेको बताएका छन् । यस आक्रमणका क्रममा जहाजमा सवार ६ जनाको मृत्यु भएको बताइएको छ ।
ट्रम्पले आफ्नो सामाजिक सञ्जाल ट्रुथ सोसलमा यो जानकारी सेयर गरेका हुन् । समाचार एजेन्सी सिन्ह्वाका अनुसार सेप्टेम्बरदेखि भेनेजुएलामा लागुऔषध तस्करीको आशङ्कामा अमेरिकाले गर्दै आएको सैन्य हमलामा कुल २७ जनाको मृत्यु भइसकेको छ ।
जहाज लागुऔषध तस्करीको लागि ज्ञात समुद्री मार्गमा यात्रा गरिरहेको र यो अवैध लागुऔषधको आतङ्कवादी नेटवर्कसँग जोडिएको अमेरिकी गुप्तचर एजेन्सीहरूले पुष्टि गरेको ट्रम्पले बताए ।
उता भेनेजुएलाका राष्ट्रपति निकोलस मादुरोले अमेरिकाले भेनेजुएलाको सरकार परिवर्तन गर्न र ल्याटिन अमेरिकामा आफ्नो सैन्य उपस्थिति विस्तार गर्न लागुऔषध कार्टेलहरूको प्रयोग गरिरहेको आरोप लगाएका छन् । केही दिन अघि, भेनेजुएलाको रक्षा र विदेश मन्त्रालयले अमेरिकी लडाकु विमानहरूको अवैध घुसपैठको निन्दा गरेको थियो ।
सन् २०२५ को अक्टोबर २ मा भेनेजुएलाको तटबाट लगभग ७५ किलोमिटर टाढा अमेरिकी युद्धक विमानहरू भेटिएको विदेशमन्त्री इभान गिलले सामाजिक सञ्जालमा भनेका थिए । भेनेजुएला सरकारले यसलाई देशको सार्वभौमिकता विरुद्धको उत्तेजना र अन्तर्राष्ट्रिय कानुन र अन्तर्राष्ट्रिय नागरिक उड्डयन महासन्धिको उल्लङ्घन भनेको छ । एजेन्सी
प्रकाशित मिति: २९ आश्विन २०८२, बुधबार
प्रतिक्रिया