काठमाडौं । मकवानपुरको भिमफेदी कारागारबाट फरार भएका एक कैदीको पूर्वी नवलपरासीमा हत्या भएको छ । गैँडाकोट नगरपालिका क्षेत्रमा शुक्रबार राति धारिलो हतियार प्रयोग गरी २८ वर्षीय नारायण कुमालको समूहगत आक्रमणमा मृत्यु भएको प्रहरीले जनाएको छ ।
पूर्वी नवलपरासीका प्रहरी प्रमुख (एसपी) युवराज खड्काका अनुसार गैँडाकोटस्थित इँट्टाभट्टा नजिक ५ देखि ८ जनाको समूहले कुमालमाथि प्राणघातक हतियारले आक्रमण गरेका थिए । घटनामा संलग्न भएको आरोपमा पाँच जनालाई नियन्त्रणमा लिएर अनुसन्धान अघि बढाइएको उनले बताए ।
मृतक कुमाल चितवनको कालिका नगरपालिका–४ पदमपुरका बासिन्दा हुन् । बलात्कार मुद्दामा दोषी ठहर भई अदालतबाट १० वर्ष कैद र ३५ हजार रुपैयाँ जरिवानाको सजाय पाएका उनी हालै ‘जेनजी’ आन्दोलनको दौरान भिमफेदी कारागारबाट फरार भएका थिए ।
प्रहरीका अनुसार कुमाल भदौ २४ गते कारागारबाट भागेका थिए । उनलाई २०७४ साल साउन ३ गते पक्राउ गरी कारागारमा पठाइएको थियो ।
प्रकाशित मिति: ८ कार्तिक २०८२, शनिबार
प्रतिक्रिया