काठमाडौं । राष्ट्रपति रामचन्द्र पौडेल कतारको राजधानी दोहामा सम्पन्न ‘सामाजिक विकासका लागि दोस्रो विश्व शिखर सम्मेलन’मा सहभागी भई बिहीबार स्वदेश फर्किएका छन् ।
त्रिभुवन अन्तर्राष्ट्रिय विमानस्थलमा राष्ट्रपति पौडेलको स्वागत उपराष्ट्रपति रामसहाय प्रसाद यादव, प्रधानमन्त्री सुशीला कार्की, गृहमन्त्री ओमप्रकाश अर्याल, नेपालका लागि कतारका राजदूत, परराष्ट्र सचिव र सुरक्षा निकायका प्रमुखहरूले संयुक्त रूपमा गरेका थिए । सो अवसरमा नेपाली सेनाले सम्मान गार्ड अफ अनर अर्पण गरेको थियो ।
कतारका अमिर शेख तमिम बिन हमद अल थानीको निमन्त्रणामा राष्ट्रपति पौडेल सोमबार प्रथम महिला सबिता पौडेलसहित नेपाली प्रतिनिधिमण्डलको नेतृत्व गर्दै दोहा प्रस्थान गरेका थिए । उनले मङ्गलबार संयुक्त राष्ट्रसंघको महासभाको निर्णयअनुसार आयोजना गरिएको शिखर सम्मेलनको मुख्य सत्रमा सम्बोधन गरेका थिए ।
त्यस क्रममा उनले “सामाजिक विकासका तीन स्तम्भहरूको सुदृढीकरण : गरिबी निवारण, पूर्ण र उत्पादनशील रोजगारी, तथा सबैका लागि मर्यादित काम र सामाजिक समावेशीकरण” शीर्षकको उच्चस्तरीय गोलमेच सत्रलाई पनि सम्बोधन गरेका थिए ।
दोहा बसाइका क्रममा राष्ट्रपति पौडेलले संयुक्त राष्ट्रसंघका महासचिव एन्टोनियो गुटेरेससँग शिष्टाचार भेट गरेका थिए । उनले बुधबार कतार राष्ट्रिय सङ्ग्रहालयको पनि अवलोकन गरेका थिए ।
सन् १९९५ मा डेनमार्कको कोपनहेगनमा पहिलो पटक आयोजना गरिएको ‘सामाजिक विकासका लागि विश्व शिखर सम्मेलन’को यो दोस्रो संस्करण हो । यस वर्षको सम्मेलनमा विश्वव्यापी विकास असमानता, जनसङ्ख्या असन्तुलन र प्रविधिको तीव्र प्रभावजस्ता विषयमा गहिरो छलफल भएको थियो ।
संयुक्त राष्ट्रसंघको सदस्य राष्ट्रका रूपमा नेपाल सधैं शान्ति, विकास र स्थायित्वका पक्षमा सक्रिय रहँदै आएको छ । अहिले नेपाल संयुक्त राष्ट्रसंघको आर्थिक तथा सामाजिक परिषद् (ECOSOC) को अध्यक्ष राष्ट्रको जिम्मेवारीमा पनि रहेको छ ।
प्रकाशित मिति: २० कार्तिक २०८२, बिहिबार
प्रतिक्रिया