काठमाडौं । नेकपा एमालेका अध्यक्ष केपी शर्मा ओलीले सुशीला कार्की नेतृत्वको सरकारले संविधानको मान्यता नपाएको दाबी गरेका छन्। भृकुटीमण्डपमा आयोजित जनसभामा उनले सर्वोच्च अदालतले यसबारे उचित निर्णय गर्ने विश्वास व्यक्त गरे।
ओलीले यो सरकार तोडफोड, आगजनी र लुटपाटबाट बनेको र जनताको वास्तविक समर्थन नभएको उल्लेख गर्दै भ्रष्टाचार अन्त्य र सुशासन प्रवर्धनका लागि आफूहरूको काम निरन्तर जारी रहेको बताए।
उनले भने, ‘जेनजीको नाममा युवाहरूलाई भ्रममा पारेर उनीहरूको भावना दुरुपयोग गरिएको छ। हामी भ्रष्टाचारविरुद्ध लडिरहेका थियौँ र देशमा सुशासन र विकासको पक्षमा काम गर्दै आएका थियौँ। हामीले कानुनको पालना गर्दै हाम्रो कार्यक्षेत्र सञ्चालन गरिरहेका छौँ।’
ओलीले सामाजिक सञ्जालको नियमन गर्ने प्रयासलाई विफल बनाउने तरिका प्रयोग गर्दै जेनजी आन्दोलनलाई उकासिएको आरोप पनि लगाए। उनले जेनजीका मागको सबै कब्जा गरेर षड्यन्त्र र राज्य संरचना, नेतादेखि कार्यकर्ताको घरसम्म जलाइएको दाबी गरे।
प्रकाशित मिति: ६ मंसिर २०८२, शनिबार
प्रतिक्रिया