ज्ञानेन्द्रले किन प्रयोग गरे बीरेन्द्र र ऐश्वर्यको तस्वीर, जो बिगतमा कहिल्यै गरेका थिएनन्

काठमाडौं । राजा ज्ञानेन्द्र शाहले नेपालीहरुको महान चाड बडादशैंको उपलक्ष्यमा एउटा भिडियोमार्फत देश विदेशका नेपालीजनलाई शुभकामना दिए । शुभकामनामा उनले देशमा अराजकता उत्पन्न भएको र भ्रष्टाचार बढेको भन्दै चरम असन्तुष्टि व्यक्त गरेका छन् । र, मुलुकलाई एउटा मियो आवश्यक रहेको कुरा भनेका छन् ।

सर्सर्ती हेर्दा गद्दीबाट हटाइएका राजाले आफ्नो राजनीतिक कुण्ठा र अहिलेको यथार्थ देशको अवस्था बोले भन्ने सन्देश जनतामा प्रवाहित गरेको देखिन्छ । तर, यो भिडियोमा राजा ज्ञानेन्द्रले प्रयोग गरेको व्याकग्राउण्ड दृश्य भने निकै फरक छ।

यसपटकको दशैंको शुभकामना सन्देशमा राजा ज्ञानेन्द्रले आफ्ना दाजु भाउजु स्वर्गीय राजा रानी बीरेन्द्र र ऐश्वर्यका राम्रा तस्वीरहरु प्रयोग गरेका छन् । २०५८ साल जेठ १९ गते नारायणहिटी राजदरबार भित्रै सपरिवार राजा बीरेन्द्र र उनको सपरिवारको हत्या भएपछि तत्कालीन अधिराजकुमार ज्ञानेन्द्र राजगद्दीमा बसेका थिए ।

गद्दीमा बस्नुपूर्व ज्ञानेन्द्र र राजा बीरेन्द्रका बीच कस्तो सम्बन्ध थियो भन्ने बारे दरबार निकटस्थहरुको फरक फरक मत पाइने गरेको छ । आफ्ना दाजु भाउजुको परिवार नै नष्ट भएपछि पूर्वराजा ज्ञानेन्द्र गद्दीमा बसेयता उनले कहिल्यै पनि बीरेन्द्र र ऐश्वर्यका तस्वीरहरु कुनै सार्वजानिक समारोहहरुमा प्रयोग गरेको पाइएको थिएन ।

यसबीचमा राजा ज्ञानेन्द्रका सक्रिय र गद्दीच्यूत भएयता धेरैवटा शाही घोषणा, शाही सन्देश र शुभकामना सन्देशका भिडियोहरु प्रकाशित भएका छन् र उनी थुप्रै त्यस्ता सार्वजानिक समारोहहरुमा पनि पुगेका छन् । तर, कुनैमा पनि स्वर्गीय राजा रानी बीरेन्द्र र ऐश्वर्यका तस्वीरहरु प्रयोग गरिएका थिएनन् ।

उनी गद्दीआरोहण गर्दा अर्थात आजभन्दा २० बर्षअघि आयोजित गद्दी आरोहण सभामा राजा बीरेन्द्र र रानी ऐश्वर्यको तस्वीर यसरी व्याकग्राउण्डमा राखिएन । त्यो स्वभाविक पनि थिएन । ‘द किङ इज डेड लङ लिभ द किङ’भन्ने राजतन्त्रको परम्परा नै हो जहांजहां राजतन्त्र छ त्यहां त्यहां । त्यसपछि उनले दिएका शाही सन्देशहरुमा कहीं कतैं पनि स्वर्गीय राजा रानीका तस्वीरहरु देखिएका थिएनन् ।

शासनसत्ता लिंदा पहिलोपल्ट २०५९ सालको घोषणा होस् वा देउवालाई अपदस्थ गर्दाको घोषणा होस् सबै सन्देशहरु भिडियोमै थिए तर त्यहां बीरेन्द्र र ऐश्वर्यका तस्वीरको उपस्थिति देखिएको थिएन । २०६५ सालमा गद्दी छाडेर हिड्दा भने उनले लाइभ पत्रकार सम्मेलन नै गरेका थिए । त्यो दुखको बेला झन् दाइ भाउजुको तस्वीर प्रयोग गर्ने कुरा पनि थिएन शायद ।

त्यसयता पनि उनले केही भिडियो सन्देशहरु जारी गरेका छन्। जस्तो गत बर्षको दशैंको शुभकामना सन्देशमा त्यसको व्यकग्राउण्डमा पर्दा मात्र थियो । गतबर्ष नै राजा ज्ञानेन्द्र दम्पत्ति नै कोरोनाले विरामी परे । निको भइसकेपछि रानी कोमललाई समेत छेऊमा राखेर एउटा भिडियो सन्देश जारी गरी स्वास्थ्यलाभको कामना गर्नेहरु सबैलाई धन्यवाद दिएका थिए ।

तर यसपल्ट भने कहिल्यै नगरेको स्वर्गीय राजाबीरेन्द्र र स्व.रानी ऐश्वर्यको तस्बीर आफ्नो शिरको दायां बायां पर्ने गरी भिडियोमा प्रष्ट आउने गरी राजा ज्ञानेन्द्रले शुभकामना सन्देश रेकर्ड गराए

रहस्यमय ढंगले आफ्नै दरबारभित्र मारिएका राजा रानीबारे नेपाली जनताका बीचमा ठूलो स्नेह अहिले पनि कायम छ । राजा बीरेन्द्र आफ्नो लामो प्रत्यक्ष शासनकालमा पनि त्यति धेरै विवादित बनेर जनताको मनमा विझाएका राजा थिएनन् । त्यसैले उनीप्रतिको श्रद्धा अहिलेको पुस्ताका नेपालीको पनि छ। उनको हत्याको शोकमा केस मुण्डन गरेर आक्रोश र श्रद्धान्जली व्यक्त गर्ने युवायुवतीको त्यसबेला लहरै चलेको थियो ।

प्रकाशित मिति: १८ आश्विन २०७९, मंगलबार