काठमाडाैं । बुटवल–तुलसीपुर उच्च अदालतको बुटवल इजलासले राष्ट्रिय स्वतन्त्र पार्टीका सभापति रवि लामिछानेलाई धरौटी रकम बुझाएपछि रिहा गर्न आदेश दिएको छ ।
बिहीबार न्यायाधीशद्वय बासुदेव आचार्य र तेजनारायण पौडेलको संयुक्त इजलासले लामिछानेले दायर गरेको निवेदनमाथि सुनुवाइ गर्दै बिगो बराबरको धरौटी बुझाउने शर्तमा रिहा गर्न सकिने निर्णय सुनाएको हो ।
अदालतका रजिस्ट्रार अमित उप्रेतीका अनुसार जिल्ला अदालतले यसअघि तोकेको धरौटी रकम तथा निवेदकले प्रस्ताव गरेको धरौटी स्वीकार गरिएको छ । उनका अनुसार जिल्ला अदालतले कायम गरेको एक करोड रुपैयाँभन्दा बढी र निवेदकले प्रस्ताव गरेको दुई करोड ७४ लाख रुपैयाँ धरौटी बुझाएपछि लामिछानेलाई रिहा गर्ने आदेश भएको हो ।
अब लामिछानेलाई धरौटी बुझाउन जिल्ला अदालत रुपन्देहीमा पुनः निवेदन दिनुपर्नेछ । सोही प्रक्रिया पूरा गरी धरौटी रकम बुझाएपछि मात्र उनी रिहा हुने अदालतले जनाएको छ ।
प्रकाशित मिति: ४ पुस २०८२, शुक्रबार
प्रतिक्रिया