काठमाडौं । नेपाली कांग्रेसका उपसभापति धनराज गुरुङले राष्ट्रिय स्वतन्त्र पार्टी (रास्वपा) र काठमाडौँ महानगरपालिकाका मेयर बालेन शाहबीच भएको सहकार्यलाई सामान्य घटना भएको भन्दै कुनै अनौठो नभएको बताएका छन्।
पार्टी केन्द्रीय कार्यालय सानेपामा सञ्चारकर्मीहरूसँग कुरा गर्दै उपसभापति गुरुङले रास्वपा सभापति रवि लामिछाने र बालेन शाहबीचको सहमति राजनीतिमा स्वाभाविक प्रक्रिया भएको बताए।
उनका अनुसार राजनीतिमा को-को मिल्छन् र को-को छुट्छन् भन्ने कुरा कांग्रेसका लागि चासोको विषय नभएको छ। उनले यस प्रकारको गठबन्धन वा सहकार्य राजनीति जारी रहँदा बारम्बार देखिने घटना भएको उल्लेख गरे।
‘बालेन र रविको सहमतिलाई मैले अनौठो मानिनँ,’ गुरुङले भने। ‘को-को मिल्छन्, को-को फुट्छन्—राजनीतिक यात्रामा यस्तो भइरहन्छ। त्यसैले यसलाई अनौठो मान्नुपर्ने कारण छैन।’
उनले राजनीति कुनै सरल प्रक्रियाबाट अघि बढ्दैन भन्ने पनि औंल्याए। ‘राजनीतिमा सबैखाले चुनौतीहरू आउँछन्। कांग्रेसले विगतमा राणाकालीन चुनौती र पञ्चायती प्रणालीको चुनौती सामना गरिसकेको छ। त्यसैले अहिलेको गठबन्धन वा सहकार्यलाई गम्भीर रूपमा लिन आवश्यक छैन,’ उनले भने।
उपसभापति गुरुङले राजनीतिक चुनौतीहरू सामना गर्न कांग्रेस सधैं तयार रहेको बताएका छन्।
प्रकाशित मिति: १३ पुस २०८२, आइतबार
प्रतिक्रिया