काठमाडौं । अर्थ मन्त्रालयले आगामी प्रतिनिधि सभा निर्वाचनका लागि कुल १९ अर्ब १५ करोड रुपैयाँ बराबर स्रोत सहमति प्रदान गरेको छ। यस्तै, हालसम्म ६ अर्ब ३५ करोड निकासा भइसकेको मन्त्रालयका तथ्यांकमा उल्लेख छ।
निर्वाचन आयोगलाई मात्रै १८ कात्तिकमा ४ अर्ब ९६ करोड स्रोत सहमति दिइएको थियो। त्यसपछि २० पुसमा थप १ अर्ब ७७ करोड ९० हजार स्रोत सहमति प्रदान गरिएको थियो। यस अनुसार निर्वाचन आयोगलाई जम्मा ६ अर्ब ७३ करोड ६६ लाख ९० हजार रुपैयाँ स्रोत सहमति दिइएको छ।
निकासाको तथ्यांकअनुसार, निर्वाचन आयोगलाई १२ मंसिरमा ४ करोड ३१ लाख रुपैयाँ निकासा गरिएको थियो। अहिलेसम्म आयोगलाई जम्मा ६ अर्ब ३१ करोड रुपैयाँ निकासा भइसकेको तथ्यांकमा उल्लेख छ।
निर्वाचन प्रयोजनका लागि सुरक्षा निकायहरूलाई समेत ठूलो बजेट स्रोत सहमति प्रदान गरिएको छ। राष्ट्रिय अनुसन्धान विभागलाई १३ कात्तिकमा २ करोड ८० लाख रुपैयाँ, नेपाली सेनालाई उपकरण खरिदका लागि २८ मंसिरमा ४ करोड ४२ लाख ५० हजार रुपैयाँ, र २० पुसमा १ अर्ब ९४ करोड रुपैयाँ स्रोत सहमति प्रदान गरिएको थियो।
गृह मन्त्रालय र मातहतका निकायलाई कुल १० अर्ब ३९ करोड रुपैयाँ बराबर स्रोत सहमति उपलब्ध गराइएको अर्थ मन्त्रालयले जनाएको छ।
प्रकाशित मिति: १६ माघ २०८२, शुक्रबार
प्रतिक्रिया