काठमाडौं । वैदेशिक रोजगारीका लागि विभिन्न देश पठाइदिने प्रलोभन देखाएर रकम असुली ठगी गरेको आरोपमा प्रहरीले दुई जनालाई पक्राउ गरेको छ।
काठमाडौं उपत्यका अपराध अनुसन्धान कार्यालय, टेकुका अनुसार पक्राउ पर्नेमा ३५ वर्षीय रुपेश लामिछाने र हिरा तामाङ रहेका छन्।
रुपेश लामिछाने काभ्रेको पाँचखाल नगरपालिका–३ स्थायी घर भई हाल काठमाडौं महानगरपालिका–३२ मा बसोबास गर्दै आएका छन्। त्यसैगरी हिरा तामाङ धादिङको खनेबास स्थायी घर भई हाल काठमाडौंको तारकेश्वर नगरपालिका–६ मा बसोबास गर्दै आएका छन्।
प्रहरीका अनुसार रुपेशले अष्ट्रेलिया पठाइदिने भन्दै एक जनाबाट ९ लाख रुपैयाँ ठगी गरेको पाइएको छ। त्यस्तै, हिराले स्लोभाकिया पठाइदिने भन्दै एक जनाबाट ८ लाख ५० हजार रुपैयाँ असुल गरी विदेश नपठाई ठगी गरेको खुल्न आएको छ।
उनीहरूले बेरोजगार युवायुवतीलाई आकर्षक तलब पाउने प्रलोभन देखाई विभिन्न देशमा लैजाने भन्दै लामो समयसम्म झुक्यानमा राखी अन्ततः सम्पर्कविहीन भएको भन्दै पीडितहरूले उजुरी दिएका थिए। सोही उजुरीका आधारमा अनुसन्धान गरी काठमाडौंका विभिन्न स्थानबाट उनीहरूलाई पक्राउ गरिएको प्रहरीले जनाएको छ।
पक्राउ परेका दुवै जनालाई थप अनुसन्धान तथा कारबाहीका लागि वैदेशिक रोजगार विभाग, ताहाचल, काठमाडौंमा बुझाइएको काठमाडौं उपत्यका अपराध अनुसन्धान कार्यालय, टेकुका सूचना अधिकारी प्रहरी उपरीक्षक रामेश्वर कार्कीले जानकारी दिएका छन्।
प्रकाशित मिति: २३ माघ २०८२, शुक्रबार
प्रतिक्रिया