काठमाडौ । नख्खु कारागारबाट फरार भएका जबरजस्ती करणी मुद्दाका एक कैदीलाई प्रहरीले ललितपुरको लगनखेलबाट पुनः पक्राउ गरेको छ।
गत भदौ २३–२४ गते ‘जेन्जी आन्दोलन’को अवसरमा कारागार कार्यालय नख्खुबाट भागेका २२ वर्षीय अशोक (अनिष) भुजेललाई प्रहरीले फागुन ३ गते साँझ पक्राउ गरेको हो। भुजेल दोलखाको शैलुङ गाउँपालिका वडा नं. ७ फस्कु घर भएका हुन् र हाल ललितपुरको भोलढोका बस्दै आएका थिए। प्रहरीलाई गोप्य सूचनाअनुसार उनी लगनखेल बसपार्क क्षेत्रमा लुकिछिपी बसेको पत्ता लागेको थियो।
भुजेललाई १३ वर्षीया नाबालिकालाई जबरजस्ती करणी गरेको अभियोगमा भक्तपुर जिल्ला अदालतले २०७९ असार २२ गते दोषी ठहर गर्दै १२ वर्ष कैद र ५ लाख रुपैयाँ जरिवाना तोकेको थियो। कारागारबाट फरार भएपछि उनको खोजी कार्य तीव्र पारिएको थियो।
पक्राउ परेपछि उनलाई आवश्यक कारबाहीका लागि पुनः कारागार कार्यालय नख्खु पठाइएको छ।
प्रकाशित मिति: ५ फाल्गुन २०८२, मंगलबार
प्रतिक्रिया