काठमाडौं। केपी शर्मा ओली आफ्नो निर्वाचन क्षेत्र झापा निर्वाचन क्षेत्र नम्बर ५ मा चुनावी अभियानलाई तीव्र बनाउँदै घरदैलो कार्यक्रममार्फत मतदातामाझ पुगेका छन्। आसन्न निर्वाचनको पूर्वसन्ध्यामा उनले दमक लगायत विभिन्न स्थानमा पुगेर स्थानीयसँग प्रत्यक्ष भेटघाट गरेका हुन्।
घरदैलो कार्यक्रममा अध्यक्ष ओलीलाई स्वागत गर्न स्थानीय मतदाताको उल्लेख्य उपस्थिति रहेको थियो। उनले युवासँग देशको भविष्य, रोजगारी र विकासका विषयमा संक्षिप्त छलफल गरेका थिए।
विशेषगरी दमक नगरपालिकाका विभिन्न वडामा पुगेका बेला स्थानीयले खानेपानी समस्या, सडक पूर्वाधारको स्तरोन्नति तथा सुकुम्बासी व्यवस्थापनका विषयमा ध्यानाकर्षण गराएका थिए।
जवाफमा ओलीले आफू प्रधानमन्त्री हुँदा सुरु गरेका अधुरा आयोजनालाई पूर्णता दिन र झापा–५ लाई नमूना निर्वाचन क्षेत्रका रूपमा विकास गर्न आफ्नो उम्मेदवारी रहेको बताएका छन्।
उनको सक्रिय घरदैलो कार्यक्रमसँगै झापा–५ मा चुनावी सरगर्मी उल्लेख्य रूपमा बढेको स्थानीयले बताएका छन्।
प्रकाशित मिति: १६ फाल्गुन २०८२, शनिबार
प्रतिक्रिया