अमेरिकी आक्रमणको मुख्य उद्देश्य इरानी शासनको नेतृत्व अन्त्य

काठमाडौं। अमेरिका र इजरायलले इरानमाथि संयुक्त रूपमा ठूलो सैन्य आक्रमण गरेका छन् । आक्रमणमा इरानको राजधानी तेहरानमा राष्ट्रपति भवन (पास्तुर क्षेत्र) सहित महत्वपूर्ण सरकारी तथा सैन्य स्थलहरू लक्षित गरिएका छन् । इरानको सरकारी समाचार एजेन्सी इरना तथा फार्सले राष्ट्रपति भवनमा आक्रमण भएको तर राष्ट्रपति मसूद पेजेश्कियान सुरक्षित रहेको रिपोर्ट गरेको छ ।

इरान सरकारले अहिलेसम्म आधिकारिक वक्तव्य जारी गरेको छैन । तर फार्स समाचार एजेन्सीले तेहरानका अतिरिक्त क़ोम, इस्फहान लगायत अन्य प्रमुख शहरहरूमा पनि आक्रमण भएको उल्लेख गरेको छ । तेहरानको एक प्रमुख विमानस्थल तथा पास्तुर क्षेत्रमा ठूला विस्फोटका रिपोर्ट आएका छन् । पास्तुर क्षेत्रमा केही मानिस घाइते भएका छन् र उनीहरूलाई अस्पताल लगिएको छ । अहिलेसम्म कुनै उच्च पदस्थ अधिकारी मारिएको पुष्टि भएको छैन ।

अल जजीराका पत्रकार एलन फिशरले वासिङ्टनका स्रोतहरूलाई उद्धृत गर्दै अमेरिकी आक्रमणको मुख्य उद्देश्य ‘इरानी शासनलाई नेतृत्वविहीन बनाउने’ रहेको बताएका छन् । यसको अर्थ सर्वोच्च नेता अयातोल्लाह अली खामेनी, राष्ट्रपति मसूद पेजेश्कियान तथा इस्लामिक रिभोलुशनरी गार्ड कर्प्स (IRGC) को नेतृत्वलाई निशाना बनाउने हो ।

स्रोतहरूका अनुसार आक्रमणहरू त्यस्ता क्षेत्रमा केन्द्रित थिए जहाँ सर्वोच्च नेता अली खामेनी आश्रय लिइरहेका हुन सक्छन् । आक्रमणको उद्देश्य शासनको शीर्ष व्यक्तित्वहरूलाई हटाएर त्यसपछिको अवस्था हेर्ने थियो ।

तस्निम समाचार एजेन्सीले सातवटा क्षेप्यास्त्र राष्ट्रपति भवन तथा सर्वोच्च नेताको निवासमा प्रहार भएको र ठूलो क्षति भएको जनाएको छ । तर रिपोर्टहरूका अनुसार सर्वोच्च नेता अली खामेनी हाल तेहरानमा छैनन् र उनलाई सुरक्षित स्थानमा सारिएको छ ।

केही देशहरूले अमेरिकालाई यो आक्रमणबारे चेतावनी दिएका छन् र “पछिल्लो दिनको योजना” के हो भनेर जान्न खोजेका छन् । किनकि सर्वोच्च नेतालाई हटाउँदा अनिवार्य रूपमा अमेरिका–समर्थक सरकार स्थापना हुने ग्यारेन्टी छैन ।

यो आक्रमणले मध्यपूर्वमा तनाव चरममा पु¥याएको छ । इरानले यसलाई ‘युद्धको घोषणा’ का रूपमा लिएको छ र ध्वंसात्मक जवाफी कारबाहीको चेतावनी दिइसकेको छ । इजरायलले देशभर संकटकाल घोषणा गरेको छ भने संयुक्त राष्ट्रसङ्घको सुरक्षा परिषद्ले आपत्कालीन बैठक बोलाउने तयारी गरेको छ ।

अमेरिकी राष्ट्रपति डोनाल्ड ट्रम्पले आक्रमणलाई अमेरिकी नागरिकको रक्षाका लागि आवश्यक कदम बताउँदै इरानले आक्रामक नीति परिवर्तन नगरेसम्म थप कारबाही जारी रहने संकेत गरेका छन् । स्थिति अत्यन्त तनावपूर्ण छ र इरानको जवाफी हमलाको सम्भावनाले विश्वव्यापी चासो बढाएको छ ।

प्रकाशित मिति: १६ फाल्गुन २०८२, शनिबार